Atualità
Lëures sëuraprò la La Plì de Mareo
USP – La Jonta provinziela à dat pro che pra la streda da Al Plan de Mareo nchin a La Plì vëniel fat lëures sëuraprò. Sun doi toc de chësta streda ie la Provinzia de Bulsan tl lëur de miuré la streda fajan nce prutezions de segurëza. De ndut iel udù dant n nvestimënt de 1,38 milion de Euro.
L prim toch sun chël che l vën laurà tla streda de La Plì scumëncia dala ncrujeda per Furcia. Sun na lunghëza de 600 metri vëniel te chësc prim toch ngrandì la raides per respeté la diretives y a na maniera che passa nce plu saurì de majeri mesuns.
Dal’autra pert vëniel mantenì tant che se lascia la vedla trassa dla streda. Pont de referimënt ie tlo dantaprima i vedli mures che ie mo boni. Aldò dl’analises fates danora iel te chësc raion danter Al Plan y La Plì n fonz de mauta, sablon y giara. Permò 6 metri sota tiera iel crëp de cuarz. Per fermé chësc raion ne basta nia dlonch i mures dessëura pert y dessotpert de streda. Aldò de studi geologiches vëniel sun doi toc nce metù micropei de 9 metri de lunghëza. Davia che l crëp ie plutosc stlet muessel unì furà 5 metri tl crëp. L’eghes de chësc raion vën avisedes demez cun drenajes.
L segondo toch dla streda a La Plì che vën miurà mesura 700 metri de lunghëza. Tlo iel me debujën de fé da nuef i mures dessëura pert de streda. I parëies vën segurei cun l sistem dla broces de parëi. Per seguré la jënt dal pericul che vënie ju sasc vëniel fat prutezions sun na lunghëza de feter 100 metri. Nce tla proietazion de chësc segondo toch an cialà de mantenì l plu che la va la vedla trassa de streda.
Per miuré y seguré la streda de La Pli iel sun pruposta dl assessëur Florian Mussner unì dat pro n custimënt de 1.377.980 Euro. N fej cont de finé i lëures nchin de fauré 2010.
as
