Atualità
Forestela de Burnech fej de plu cuntroi ai motores da cross
USP – L Ispetorat de Burnech fej de plu cuntroi ai motores da cross ti raions sota defendura. Me ti ultimi dis iel unì straufà sies iedesc. “I cuntroi vën fai ajache on giapà truepa lamënteles per via di motores da cross” spiega Silvester Regele, che mëina l Ispetorat dla forestela a Burnech. L problem reverda nce dassënn la Val Badia.
“Sibe tei che va da mont su che nce alpinisć se à lamentà per la fuera di motores sun i troies ntëur l Plan de Corones, la mont de Lijiun y i raions tl parch naturel tla Val Badia. “For inò nes iel unì fat ala savëi che l vën furna cun i motores da cross sun i troies da mont” dij l diretëur dl ufize che sorissea che i cuntroi ie na reazion a chësta comunicazions. La sada passeda iel unì fat cuntroi tla lueges critiches. L resultat ie stat de suzes. L ie unì abinà chëi dai motores sun i troies da mont sun l Plan de Corones y sun la montes ntëur al Astjoch. N valgun dis dant an nce abinà doi jëuni dla Val Badia ntan che i furnova cun si motores da trial sun troies da mont tl Chemun de Corvara. Sun l mumënt iel nce unì straufà. Te vel caji iel nchinamei stat debujën de mandé inant i dac ala stazion di Carabinieri de cumpetënza, per cialé do sce papieresc y assegurazions ie a post.
Tla Provinzia de Bulsan iel pruibì furné cun mesuns a motor ora de streda. Sun stredes foresteles y da mont possa me furné chiche ie patron y che à nce la lizënza. “I motores da cross ne fej nia me dann al bosch y ala montes, i desturba nce i tieres salveres y chëi che va da mont su” sorissea Regele. I motores ie nce de pëis te chisc raions per via dl fum y dla fuera che i fej.
as
