Frabiché | 03.11.2009 | 16:57

Batù tres l tunel a sud dla zircunvalazion de Persenon (cun audio)

USP – A Persenon iel (ncuei) ai 3 de nuvëmber unì batù tres l tunel a sud dla streda de zircunvalazion. Chësc mumënt mpurtant di lëures ie unì arjont ala prejënza dl presidënt dla Provinzia Luis Durnwalder y dl assessëur Florian Mussner. L gran lëur a Persenon ie un di ntervënc de majera mpurtanza tla Provinzia de Bulsan n cont dl muvimënt sun streda per miuré la situazion dla zità. La prima pert dëss bele unì giaurida l ann che vën.

La streda de zircunvalazion de Persenon vën fata te trëi loc (pertes) sun na lunghëza de 3 chilometri. Tla prima pert di lëures vëniel fat l tunel a sud y l tunel a nord, che n fej cont de finé nchin d’instà 2010. L tunel a nord che mesura 782 metri de lunghëza ie bele unì giavà tres al scumenciamënt dl 2009, tlo muessel mo unì metù asfalt. Ti ultimi mënsc iel dataprima unì laurà tl tunel a sud che mesura 1.200 metri. Chësc tunel passa sota la scines dla ferata y doi iedesc sota l’autostreda. L ie trëi pusciblteies da pudëi n cajo mucé ora y na ventilazion verticala. Śën iel unì batù tres chësc gran tunel arjunjan nsci n bon pont di lëures dla zircunvalazion de Persenon y Vahrn. Te chësc mumënt mpurtant di lëures, unit a se l dé feter sota la stazion dla ferata, ie nce stat leprò l presidënt Luis Durnwalder y l assessëur ai lëures publics Florian Mussner.

“La Provinzia fej de gran nvestimënc per miuré la stredes, à dit Durnwalder, chësc vën fat per miuré la cualità de vita di zitadins. La mpurtanza che la persones possa viver te cundizions plu sanes ie l fin prinzipel che n uel arjonjer cun la stredes de zircunvalazion. Tl cajo de Persenon iel unì spendù ite 12,5 milion de Euro al ann”. L assessëur Florian Mussner à sorissà che tulan demez la fuera, l fum di mesuns a motor y l stress dl muvimënt, se aspieten n gran miuramënt dl bënsté dla populazion dl post. “On crëta che cun chisc lëures, scumencei de agost 2006 y che dëssa finé per l instà 2010, pudon giaurì la prima pert dla zircunvalazion de Persenon y Vahrn” à dit l’assessëur ai lëures publics.

L custimënt de dut chësc lëur ie de feter 114 milion de Euro. Per l prim toch, che ie nce l majer, vëniel spendù ite 70 milion de Euro.

as

Galaria dales fotografies

Durnwalder y Mussner cun tecnics y ambolc, riesc do che l ie unì batù tres l majer tunel dla zircunvalazion de Persenon; Foto USP/Pertl.