Atualità
Puent nuef a Corvara sun la streda dl jëuf
USP - L Ufize provinziel per apalc à ai 3 de nuvëmber sëurandat i lëures per fé n puent nuef a Corvara sun la streda che mëina sun Frea. I lëures riesc sota Colfosch unirà scumencei d’ansciuda.
L puent nuef unirà fat al 14esim chilometer dla streda dl Jëuf de Frea danter Colfosch y Corvara, riesc sëura l puent che ie unì giaurì dan trëi enes. “Aldò de mesurazions che ie unides fates ne garantësc chësc puent nia plu l pëis di gran mesuns, y aldò de analises ne cunvëniel nia plu l cumedé, perchël uniral d’ansciuda fat da nuef” spiega l assessëur Florian Mussner. Per la preparazion tecnica y i lëures iel aldò dl proiet udù dant n custimënt de ndut 617.680 Euro.
La ncëria ti ie jita ala firma "Impianti Colfosco AG" che à pità de fé l puent per 332.000 Euro, lascian nsci do l priesc de 13% permez ala soma proieteda. Cater firmes se ova pità de fé chësc lëur. La firma da Colfosch à aldò dl cuntrat, 120 dis a desposizion per fé l lëur.
L puent che unirà fat da nuef mesura na lunghëza de 12,6 metri. Ntan i lëures puderà l muvimënt de streda passé a na maniera provisoria dessëurapert, ulache n curirà pro l ruf.
as
