Atualità
Lauré deberieda dla trëi cunsultes ai jëuni
USP – La cunsultes provinzieles ai jëuni dla trëi grupes de rujeneda se anconta n iede al ann per na senteda cun duc deberieda per se baraté ora n cont de argumënc prinzipei dl’atività, manieres de lëur y fins da arjonjer. Da permò ie unì tenì chësta senteda a Persenon.
Do che la cunsultes ie l ann passà unides litedes da nuef se tratovela n iede de mparé a se cunëscer miec danter reprejentanc de rujeneda tudëscia, ladina y taliana. Tl purté dant la manieres de lëur dla defrënta cunsultes, iel unit ora che n lëura n pert ala medema maniera: sëuraprò ala sentedes uni mëns cun n orden dl di dat danora, se anconta grupes de lëur per jì plu sot a argumënc, danter la sentedes vëniel pona comunicà tres internet.
I argumënc che dëssa unì tratei dai jëuni de duta la grupes de rujeneda ie la interculturalità, l tré pea di jëuni tl ulentariat y tla respunsabltà, la furmazion di culaburadëures, l svilup dl marcià de lëur, l radicalism de man drëta y l cumbater de estremism, ma nce l bilanz provinziel 2010.
Argumënc prinzipei ie unic cunscidrei la culaburazion ativa di jëuni, i media n referimënt ala junanza y lëur per i jëuni, ma nce la viulënza y l radicalism de man drëta. Per chisc argumënc à trëi grupes de lëur purtà dant scumenciadives che dëssa unì realisedes dala trëi cunsultes. Per l ann 2010 dëssel unì purtà inant sciche scumenciadiva deberieda, la culaburazion cun la trëi cunsultes di sculeies n cont dl rujené pea a tò dezijions. Chësc dëssa unì a se l dé te trëi-cater vares.
L bon tlima tla grupes de lëur mescededes à trat su la dumanda ciuldì che l ne vën nia plu suvënz fat sentedes deberieda, mpede lauré paralelamënter y nia nuzé sinergies de valor.
as
