Atualità
Premiazion di artisc' ladins ai 20 de nuvëmber
USP – La Repartizion ala Cultura ladina dla Provinzia de Bulsan ova metù a jì n cuncors per artisc’ dla valedes ladines. N vënderdi ai 20 de nuvëmber sëuradajerà l assessëur provinziel ladin Mussner l pest provinziel per artisc' ladins tla Galaria Prisma a Bulsan. Te chësta ucajion vëniel nce giaurì la mostra.
Philipp Messner de Urtijëi y Giancarlo Lamonaca de S.Martin de Tor à chëst ann venciù deberieda l pest provinziel per artisć ladins. Sëuraprò ala premiazion uniral tla galaria Prisma nce giaurì la mostra cun i lëures che à venciù l cuncors y mo d’autra nuef opres che ie unides crises ora dala giuria. I artisć che à fat chisc lëures ie Arnold Holzknecht, Bruno Walpoth, Edmund Nagler, Flavio Senoner, Isabell Pitscheider, Ivan Lardschneider, Matthäus Kostner, Peter Demetz y Walter Moroder.
La premiazion dl Pest provinziel per artisć ladins unirà tenida
n vënderdi, 20 de nuvëmber
dala 7 da sëira
tla Galaria Prisma, streda Weggenstein 12
a Bulsan.
Danora rujenerà l assessëur provinziel Florian Mussner y Helga von Aufschnaiter, presidënta dl “Künstlerbund”. Al artist Richard Agreiter ti uniral sëurandata l titul de cumëmber de unëur dla lia “Künstlerbund”. La critica dl’ert Edith Moroder fajerà la ntroduzion. Per chësta ucajion uniral sunà l pez de mujiga “Uec sunënc”.
Al cuncors scrit ora dala Repartizion ala Cultura ladina dla Provinzia de Bulsan a fat pea à 28 artisć dla cin valedes ladines, nce de chëles de sëuramont. Lamonaca à fat doi chedri cun fotografies metudes nsëuralauter che semea na pitura. Philipp Messner à prejentà na scultura de mitel a forma de stëila. L titul dl pest scrit ora ie stat “Concurs artistich 2009… eroism, inier, incö doman” y fej referimënt al ann comemoratif 1809-2009.
as
