Atualità

Trafich | 07.10.2011 | 10:06

Brosciüra S.O.S. Zebra ince por ladin

USP – Por sensibilisé la popolaziun y ciarè de tignì fora desgrazies sön les strisciores pedonales à l’Assessorat por i laûrs publics metü a jì na campagna a na moda che al vëgnes metü plü averda ales porsones che va a pé, che é dagnora la pert plü debla pro desgrazies. La brosciüra d’informaziun y i inserac é ince gnüs fac por ladin.

Le conzet por sensibilisé la jënt por ći che reverda le prigo pro les strisciores pedonales tol ite i comuns, les scores y les assoziaziuns de jënt atempada. Por i comuns él gnü laurè fora criters por fà les strisciores pedonales, a na moda da tignì fora le prigo bele damperfora.

Danter chi che va a pé é bëgn i scolars y la jënt atempada les döes categories plü al prigo. Insciö él gnü arjigné ca na brosciüra olache al vëgn splighé ćiünes che é les regoles de comportamënt sön les strisciores pedonales. A na manira adatada por i mëndri y la jënt atempada vëgnel splighé coche chi che va a pé y chi che va cun l’auto dess se comportè por schivé na desgrazia. Consëis y comportamënć falà dëida se dè jö cun le prigo y imparè val’ por smendrì les desgrazies. Dlungia les informaziuns sön le comportamënt de chi che va a pé y de chi che va cun l’auto, vëgnel inće dè informaziuns sön ći che le Sorvisc Strades fej por schivé les desgrazies sön les strisciores pedonales.

La brosciüra d’informaziun é gnüda fata por ladin en colaboraziun cun l’Ofize Chestiuns linguistiches. Dötes les porsones interessades, dantadöt i insegnanć y i acompagnadus de porsones atempades, po s’la desćiarié jö da internet chilò: www.provinzia.bz.it/junta/junta-provinziala/mussner.
“Aladô dl prinzip de rotaziun é la brosciüra SOS Zebra gnüda arjignada ca tl idiom badiot, le proscim iade gnaràl adorè le gherdëna” spliga l’assessur ladin.

--- 
De plü informaziuns sön la campagna S.O.S. Zebra ciàfon inće tl comunicat stampa “Cunzet nuef de sensiblisazion per schivé desgrazies sun i zebra”.

as

Galaria dales fotografies

Downloads