Atualità
Azetà trëi soluzions per l'eghes a Badia y sun Mont de Sëuc
USP – De soluzions per la gestion dl’l'eghes sun Monta Sëuc - Puntives y a Badia se ala (NCUEI) ai 12 de utober tratà tla senteda dla cumiscion ambientela dla Provinzia de Bulsan. La cumiscion cun si presidënt Luigi Minach à azetà duc trëi proiec tla valedes ladines.
La sarenera de Saltria, sun Mont de Sëuc, ne respetea nia plu l’esigënzes atueles. Per chësta rejon ulël l’ECO Center l saré y mené l’eghes fosces ora per la valeda de Iender nchin tl chemun de S.Crestina acioche les possa ruvé nchin tla sarenera a Puntives. Nscila iel unì udù dant na canalisazion de 4.408 metri. Per valivé ora la prescion danter Saltria y la canalisazion che ie bele, val debujën de njinies a posta. A luesc uniral nce metù doi roles per garantì la segurëza. L custimënt de chisc ntervënc ie udù danora per 1,1 milion de euro.
Ulache ruva adum i ruves de Badia y de San Ciascian iel udù dant ntervënc de mudazion pra l mplant da fé strom Sompunt, tl chemun de Badia. Chisc lëures dëssa miuré l regorer demez dl’ega y a chësta maniera ressolver la dificulteies dl mplant. Aldò dl proiet mandà ite dal Chemun de Badia y sun dumanda dl’ufize per l’eghes, uniral fat na rampa acioche i pësc posse passé da una al’autra pert.
Tl Chemun de Badia, a La Ila, iel debujën de fé da nuef la canalisazion per spartì l’eghes blances dal’eghes fosces. L prim lot ie unì proietà tl raion de Funtanacia. Aldò dl proiet dëssa la roles nueves passé sota la stredes publiches. L’eghes fosces dëssa passé tres la roles prinzipeles nchin ala sarenera, l’eghes blances dla plueia unirà avisedes tla Gadera al autëza dl raion dal sport.
as
