Atualità
Aiuc per l’amiscion al’università de Persenon
USP – L Stat à chëst ann mudà la dumandes dl ejam de amiscion per fé l’università de scienzes dla furmazion a Persenon. Me 19% ie stai boni de passé l’ejam. Davia che la furmazion di maestri de scola ie scrita dant dal Stat, uel la Jonta provinziela abiné na soluzion per judé i jëuni a pudëi fé chëst studi universiter.
“La furmazion di nsenianc ie scrita dant, perchël i chësc studi da cunscidré autramënter permez a chëi che vën zënza pitei tl’universiteies” à di l presidënt dla Provinzia (NCUEI) ai 17 de utober do la senteda dla Jonta provinziela. Davia che te d’autra regions iel stat mo de manco candidac che ie passei l’ejam de amiscion uelen deberieda cun chëstes ruvé pra na soluzion acioche de plu ruve permez al studi dla scienzes dla furmazion.
L ejam de amiscion cumporta tl respuender a 80 dumandes che reverda la rujenedes, l ciamp dla leteratura-storia-geografia y la scienzes natureles. Per passé l ejam adroven 60 respostes drëtes. Chëst ann iel stat 220 jëuni che à purvà y me 42 (19%) ie passei l’ejam. (Di candidac tudësc che se à prejentà ie passei l 13%, di taliani 23% y di ladins ie passei 89%.) “Chisc ie massa puec per nosta scoles y scolines” à dit Durnwalder.
Tla Jonta provinziela iel unì rujenà de ti dé la puscibltà de jì ala lezions a chëi che à arjont na cërta cumpëida de ponc ma ne ie nia passei l’amiscion y de ti dé pona n’auter ann mo na ucajion de purvé. N’autra pruposta fossa nce de damandé n ejam de amiscion a usc. N culaburazion cun d’autra regions cialeran śën de abiné na soluzion pra l minister de cumpetënza.
Ejams de amiscion ala scienzes dla furmazion
tudësc 136 prejentei 17 passei (13%)
taliani 75 prejentei 17 passei (23%)
ladins 9 prejentei 8 passei (89%)
NDUT 220 prejentei 42 passei (19%)
as
