Atualità
La streda da Pruca ite dëssa inò unì miureda
USP – L stradon de Gherdëina da Pruca ie for inò unì miurà te si ponc plu critics. I ambolc de Gherdëina se damanda che l vënie mo slargià autri doi toc de streda. Per chësta rejon se à l assessëur ala stredes Florian Mussner (NCUEI) ai 17 de nuvëmber ancuntà cun i ambolc sul post.
Trëi chilometri dedite da Pruca, ulache pea ora la streda per Solaion, fovel l ann passà de nuvëmber unì fat doi puenc nueves y slargià la streda. Te chësta luegia se à l assessëur provinziel ancuntà cun i ambolc per cialé plu avisa ulache l fossa mo debujën de slargë la streda. “Doi majeri mesuns se stënta tlo dassënn a passé via, na streda plu lergia judëssa perchël a arjonjer plu saurì Gherdëina” à argumentà Ewald Moroder, Eugen Hofer y Peter Mussner. L assessëur à spiegà che per chësc toch an bele nvià via la proietazion.
N segondo pont critich, per chël che i ambolc à damandà de slargë la streda ie l puent riesc sota la ustaria Stern. “Ti proscimi ani cialerons de fé lëures sun chisc doi ponc a na maniera che n possa ruvé plu saurì te Gherdëina” à dit Florian Mussner.
L ie bele 10 ani che te na culaburazion danter Servisc provinziel per la stredes, i chemuns y la Repartizion per nfrastrutures de stredes vëniel cialà de slargë i prim chilometri dla streda de Gherdëina da Pruca ite. Tl raion “Villnad” fovel i ultimi ani unì zarà ju l vedl mulin y slargià la streda. Davia che l puent fova tlo plu strënt dla streda cumededa, univel a se l de n pont de pericul a furné oravier. Nscì iel mo l ann passà unì fat n nvestimënt per fé doi puenc nueves y slargë la streda.
as
