Atualità

Politica | 29.11.2011 | 14:14

Unesco y Manifest Südtirol danter la prioriteies de Laimer per l bilanz 2012

USP - Na lingia de proiec tla ciamp dl ambient à l assessëur Michl Laimer prugramà de finanzië tres l bilanz provinziel 2012, ma dantaprima l cuncretisé dl plann per l tlima che vëij dant per n auter ann i prim vares cuncrec. Na priorità arà nce ideies n cont de Dolomites-Unesco y l „Manifest Südtirol“ cun n prim pruvedimënt che reverda l mëter adum de urbanistica y defendura dla cuntreda.

Sibe l assessëur Berger che nce l assessëur Laimer à (NCUEI) ai 29 de nuvëmber purtà dant l mudé dl tlima sciche pont da chël che depënd si prioriteies tla programazion dl bilanz provinziela da n auter ann. „On bele laurà ora na strategia co che pudon fé nosta pert per defënder l tlima, tl 2012 scumencerons a cuncretisé i prim pruvedimënc“ à dit Michl Laimer tla cunferënza stampa. L unirà metù su n’agenzia dl’energia, sota chëla che giaterà nce lerch l’agenzia Cësa Tlima. „L’agenzies dl’energia se cruzierà de management dl’energia, la dajerà cunsulënza, la tenirà cuntat cun Roma y Brüssel y sarà partner dl’economia, di zitadins y dl’aministrazions“ à dit l assessëur.

Pont de priorità per l 2012 sarà nce l svilup dl’arpejon mundiela Dolomites-Unesco. „Tlo vala de lauré ora n cunzet turistich, cossa che se à tëut sëura la Provinzia de Bulsan“ nscì l asssessëur. N pont de mpurtanza sarà la gestion dla mubilità tla Dolomites. „Ala fin di conc ne se tratela nia de mëter su de biei placac a ruvé tl raion, ma de mantenì chësta richëza, la svilupé y de la prejënte bën“ à dit Laimer.

L ann 2012 sarà nce n ann particuler per l’aministrazion dla rë dal strom. Do che la SELNet à sëurantëut chësta rë, pudëssa chemuns nteressei sëurantò la rë che ie te si raion.

30 milion de euro ie prugramei per l’agenzia dl’ambient, scebën che majera pert (24 milion de euro) vën nuzei per nfrastrutures y servijes ambientei, sciche l sarené de eghes o tò y jì l refudam.

Esprescion dla strategia provinziela penseda al daunì sarà l „Manifest per Südtirol“, che tulerà l posta dl LEROP (Landesentwicklungs- und Raumordnungsplan) y che dajerà dant ndicazions per i ciamps soziei de majera mpurtanza. „Chësc ne sarà na me n studi, ma l dëssa unì dat pro sciche lege provinziela che muessa unì respetea da duc i autri pruvedimënc“ à cundedì Laimer. La se trata do de n program de prioriteies per l svilup generel y na maniera nueva de pensé. “Nia plu debota, majer y de plu, ma plu bel, miëur, plu pensà y plu bel plan” à dit l assessëur.