Economia | 02.12.2011 | 16:16

220 milion per l’economia tl bilanz 2012

USP – L bilanz provinziel da n auter ann sarà de 5,12 miliardes de euro. 220 milion de euro à la Jonta provinziela udù dant per sustenì l’economia. Co che chisc mesuns finanziei vën nuzei à (NCUEI) ai 2 de dezëmber prejentà i assessëures Roberto Bizzo y Thomas Widmann.

Feter 220 milion de euro va diretamënter al’economia y ie nce prugramei ti capituli aldò. La spartizion vëija dant 42,8 milion de euro per l turism, 36 milion de euro per l’inuvazion y 81 milion per l cumerz, artejanat y ndustria. L’autra 60 milion vën metudes tl fond de rotazion per sustenì l’economia. “Chësc fond de rotazion ie debujën per ti tenì permez al majer problem che cumporta la crisa, la dificultà per la firmes de unì dainora cun la licuidità” à dit Widmann.

La Jonta provinziela sënta sëuraprò sun vares nternaziunei da pert dla firmes da tlo, cuncretamënter sustenian l export. “Son de chëla che na firma à plu stabilità sce la possa se stizé sun de plu giames” à dit l assessëur. Nsci vala de sustenì mo de plu la furmazion. “Chiche uel tenì pea sun l macià muessa senté sun cualità, y per avëi cualità iel debujën de furmazion” à dit Widmann.

Na priorità ie nce l sustëni de cooperazion. La firmes dl Südtirol ie majer pert drët pitles, perchël possa na culaburazion purté vantajes n cont de cumpré ite, cuncorsc y nce per se prejenté deberieda.

No me sustëni n cont de finanziamënt, ma nce aiuc n cont de tò ju pëis ala firmes à per la Jonta provinziela priorità. “Chësc per ti lascé plu pusciblteies tla casses – nsci l assessëur Bizzo, nuzea la Provinzia si pusciblteies n cont dla chëuta IRAP. Nce per l ann che vën resta chësta njonta cun 2,98 percënt, la plu bassa tla Talia. Firmes che ie de ejëmpl n cont de inuvazion y respet per l ambient, paia cun 2,5 percënt mo de manco.

as

Galaria dales fotografies

I assessëures Bizzo y Widmann ti dà for n majer pëis al’inuvazion; foto USP/Pertl

Downloads