Atualità
Jonta provinziela uel sustenì l sparanië per frabiché
USP – Nchin ala fin dl ann ulëssa la Jonta provinziela mëter su n model de sparanië per frabiché. Tla descuscion (da NCUEI) dl 30 de jené, ie unit ora do pusciblteies che se basa tramedoves sun l mëter da na pert scioldi. Aldò de Durnwalder uelen premië duc chëi che à sparania scioldi.
Bele da plu mënsc ulëssa i assessëures provinziei nvië via n model de sparani per l frabiché aldò dl ejëmpl tudësch. Ma davia che n se stënta cun l sistem talian dla chëutes, cëlen sën da abiné na streda deberieda cun la banches y l fond dla pensions sëuraprò. I jëuni dëssa ruvé pra l finanziamënt de n cuatier scumencian nstës a sparanië.
La prima puscibltà tol ite l fond de pension sëuraprò. Tlo pudëssel bele abenëura unì paià ite na pert dl paiamënt, n iede per l cuatier y pona sciche pension sëuraprò.
Tla segonda puscibltà fossel udù dant trëi seves: i scioldi sparaniei, n mprëst a de bona cundizions y n cuntribut provinziel. Aldò dl presidënt, che ie plu per chësta segonda varianta, fossel la banches a mpresté unfat scioldi sciche tant che l ie unì sparanià y chësc per 20 ani a n fit smendrì al 3,5%. La Provinzia premiessa l sparanië cun n majer cuntribut. Chësta segonda puscibltà se lascëssa nvië via zënza mudé vel lege. Aldò de Durnwalder ne dëssa la rates per paië ju l mprëst nia vester majeres che l fit per n cuatier.
as
