Atualità
Documentazion dl savëi culturel te Gherdëina: cunferënza stampa ai 13 de merz
USP – De vedla tradizions y usanzes de Gherdëina, ma nce de vedli mestieres, stories o liejenes ne sà trueps nia plu n nëut. L Museum Ladin Ciastel de Tor fej pert de n proiet nternaziunel per documenté l patrimone culturel nia materiel. L proiet interreg Talia-Svizra ECHI unirà prejentà n merdi ai 13 de merz te na cunferënza stampa a Bulsan.
L senificat de scinché l pëir da Marcià Segra Sacun o l ciuldì de cherdé “helau” dai jëuni che va a tré zedules ie me doi ejëmpli de n patrimone culturel che aldò de na cunvenzion UNESCO dl 2003 dëssa unì mantenì. Documenté chësta sort de patrimone culturel y l prejenté al publich ie un di fins dl proiet interreg te na culaburazion sëura la sëida dla Talia y Svizra. Pra l proiet E.CH.I (Etnografie italo-svizzere) fej pea i ciantons svizri Vallais/Wallis, Tessin, Grijons, la regions Lombardia, Val d’Aosta, Piemonte y la Provinzia de Bulsan cun l Museum Ladin Ćiastel de Tor.
L Museum Ladin à cris ora de dediché la nrescida a Gherdëina, nciarian l etnologh y atropologh ladin Emanuel Valentin de fé n inventar dl patrimone culturel nia materiel. Nchinamò iel bele unì tëut ca ntervistes di ani ’80, les metan tl computer y juntan pro mo tuedes y material video. L material che conta usanzes y tradizion de Gherdëina che manacia de jì perdudes unirà mo ntan chësc ann metù a desposizion dl publich.
L proiet ECHI/Etnografies italo-Svizres unirà prejentà ai media
n merdi 13 de merz 2012
dala 10.30
tla sala stampa dl palaz Widmann a Bulsan.
Ala cunferënza stampa tulerà pert la assessëura provinziela ala cultura Sabina Kasslatter Mur, la respunsabla dl proiet per la Lombardia Renata Meazza, l diretëur dl Museum Ladin Stefan Planker y l etnologh y antropologh Emanuel Valentin.
Culaburadëures di media ie nviei ala cunferënza stampa y de cunedì i cuntenuc.
as
