Atualità

Scora / Cultura | 13.04.2012 | 12:18

Nseniamënt paritetich nce tla scola prufesciunela a Urtijëi

USP - Cun l proscimo ann de scola uniral nce tla scola prufesciunela a Urtijëi nsenià do l model paritetich. A chësta maniera vëniel garantì l nseniamënt tla trëi rujenedes provinzieles, ladin, tudësch y talian cun sëuraprò nce l nglëisc.

Nchinamò fova la scola prufesciunela per la artejanat artistich na scola tudëscia. Da canche la scola ie passeda tla cumpetënza dl Ntendënza ladina an pudù scumencé a mëter a jì nce l nseniamënt do model paritetich. D’autonn saral tan inant che l unirà nsenià la materies per tudësch y nce per talian. Chësc sambën sëuraprò al nseniamënt de rujeneda nstëssa, per chël che l sarà per l prim iede la segonda ëura de ladin y doi ëura de nglëisc. L ëura de religion vën nsenieda tla trëi rujenedes dla provinzia.

La partizion dla 39 ëura de nseniament al’ena ie unida data pro sun pruposta dla scola. “Per mpartì la rujeneda ala singula materies ons tenì cont dla situazion dl Lizeum d’ert, chësc a na maniera che chëi che ulëssa ruvé nchin ala matura se feje plu saurì a fé la cuarta y cuinta tlas tl’autra scola” spiega la diretëura Elisabeth Baur. Cun l ann de scola 2012/13 uniral tla scola prufesciunela per ejëmpli nsenià per l prim iede storia d’ert o elaburazion de dac tla rujeneda taliana.

L nseniamënt paritetich nce tla scola prufesciunela ie na bela arjonta per la populazion ladina. “Cun chësta nuvità vën l model dla scola ladin metù n droa te dut l sistem furmatif dla valedes ladines” sorissea l ntendënt Roland Verra. La ntroduzion dl nseniamënt paritetich tla scola prufesciunela vën nce valuteda dal assessëur provinziel Florian Mussner sciche var inant per seguré l daunì de chësta scola.

Materies y rujeneda de nseniamënt tla Scola prufesciunela a Urtijëi

materia                                 rujeneda
Religion                                  3 rujenedes
Tudësch                                 tudësch
Talian                                     talian
Ladin                                      ladin
Nglëisc                                   nglëisc
Storia y Educazion zivica          tudësch
Elaburazion de dac (EDV)         talian
Conc                                      tudësch
Educazion fisica                       talian
Dessëni Liede                          tudësch 
Proietazion y dessëni tecnich     tudësch
Storia d’ert                              talian
Depënjer                                 tudësch/talian
Ziplé                                       tudësch/talian
Mudelé                                    talian
nseniamënt sëuraprò                tudësch

as

Galaria dales fotografies

Tla scola prufescionela a Urtijëi uniral cun l ann de scola 2012/13 nsenià do l model paritetich;