Atualità

Economia | 07.05.2012 | 15:22

Dat pro l program de atuazion per l parch tecnologich

USP – Ti proscimi cater ani uelen realisé n parch tenologich a Bulsan per arjonjer n majer potenzial de inuvazion, svilup y tueda tl Südtirol. Sun l vedl grunt dl Alumix che mesura 60 hectar, fej la Provinzia nvestizions per 54 milion de euro per ressané la strutura che ie bele y leprò mët la BLS (Business Location South Tirol) 6 milion de euro a desposizion acioche firmes gëure tlo na sënta.

“Tl Südtirol iel da lëur per duc, ma chëi plu da talënt ne resta nia tlo ajache i ne giata nia la stieres aldò” à dit l presidënt Luis Durnwalder do la senteda dla Jonta, “perchël ulons se dé da fé per avëi nce tl daunì stieres de livel aut. Nscì adurvons na luegia ulache la istituzions publiches y privates de tueda posse lauré tl’inuvazion y nuzé sinergies”. Chësc luech de tueda sarà l parch tecnologich a Bulsan Sud. La Jonta provinziela à (NCUEI) ai 7 de mei dat pro l program de autazion per 16 hectar ulache ti proscimi cater ani dëssel unì realisà l parch tecnologich.

Chësc parch unirà fat aldò de n sistem a modui, chësc uel di che aldò dl bujën possa la pertes unì tachedes pro ala pert zentrela dl parch. De ndut vëniel frabicà 200.000 metri cubich, 150.000 ie bele. Nchinamò iel bele unì spendù ite 7 milion de euro, 60 milion sëuraprò ie udui dant per la realisazion dl parch. Aldò dl presidënt dla Provinzia à bele 70 firmes mustrà nteres per na luegia tl parch tecnologich. Tla pert zentrela dëssel unì fat laboratories, berstotes y ufizies per l’università, l’Eurac y l TIS. Chësta pert unirà a custé feter 54 milion de euro che unirà metui a desposizion nchin dl 2015. Chëst ann à la Jonta provinziela udù dant na nvestizion de 10 milion de euro.