Atualità
Adatamënc al aeroport – culaburazion cun Trënt
USP – La plaza dl aeroport a Bulsan dëssa unì adateda tulan demez na pert a nord y nen juntan leprò n’autra a sud. Sëuraprò a chësta dezijion, à la Jonta provinziela de Bulsan (NCUEI) ai 11 de juni nce fat ora de pité a Trënt na culaburazion tla gestion dla strutura.
La Jonta provinziela ie stata a una de giaurì la strutura dl ABD a na culaburazion cun Trënt. Nsci iel unì fat ora de pité l 30%. I proscimi vares sarà la tratatives cun Trënt, l stlarì de details de carater tecnich y de lascé sciazé l valor dla strutura per pudëi fé na spartizion. Aldò de Durnwalder judëssa na culaburazion cun Trënt a avëi plu passajieres y a curì l debit.
La pert che unirà tëuta demez a nord dla plaza dl aeroport vën metura leprò a sud per arjonjer mpo la lunghëza che se damanda i regulamënc de segurëza. Aldò de chisc regulamënc vëniel tla pert a sud nce fat n raion de feter 200-250 metri. “Chësc raion de segurëza ne vën nia curì cun asfalt, tlo messons me taië i lëns da versura” à dit l presidënt Luis Durnwalder te cunferënza stampa.
as
