Atualità
Ai 5 setëmber festa dl’Autonomia cun i presidënc Napolitano y Fischer
USP - Ai 5 de setëmber ne vëniel chëst ann nia me festejà i 66 ani dala sotscrizion dl Tratat de Paris. La Jonta provinziela festejea te chësta ucajion i 40 ani dl Statut d’Autonomia nuef y i 20 ani dala fin dl stritoz danter l’Austria y la Talia per l Südtirol. Chësc unirà fat cun doi ghesć’ de unëur, i doi presidënc de Stat Giorgio Napolitano y Heinz Fischer. A tramedoi ti uniral sëurandat l gran orden de merit.
L'Autonomia dl Südtirol vën ududa de ejëmpl per ressolver cunflic de mendranzes. "Che la ie nscila y che l Südtirol se à svilupà a na maniera che n ne se ëssa danora mei pensà, pudons rengrazië la forzes democratiches y de respet per la mendranzes tla Talia y tl'Austria" sorissea l presidënt la Provinzia Luis Durnwalder.
40 ani do che ie jit n droa l segondo statut d'Autonomia, uel la Jonta provinziela perchël sëurandé l gran orden de merit dl Südtirol ai doi reprejentanc plu auc dla Talia y Austria a inuem de duc chëi che à laurà pea per l'Autonomia. L se trata dla majera uneranza che l Südtirol possa sëurandé y chësta vën data per rengrazië duc chëi che à cun l dialogh purvà à ti dé na puscibltà de daunì ala jënt dl Südtirol.
La festa cun i doi presidënc de Stat unirà tenida
n mierculdi 5 de setëmber
dala 11.30
tl Kursaal a Maran.
Jurnalisć che uel vester leprò muessa se acredité ala manifestazion. I formuleres per l'acreditazion de ublianza per jurnalisć, fotografes y operadëures cun camera ie da giapé sun la plata web dl Cumissariat dl Guviern (www.prefettura.it/bozen) y muessa unì mandei ite cun duta la nfurmazion nchin ai prim de setëmber.
La redazions nteressedes possa nce damandé de plu acreditazions per pudëi a chësta maniera curì duc i mumënc dl program. Pra la ntreda dl Kurhaus uniral ntëur la 11.00 saludà Napolitano y Fischer, riesc dedite, tla Rotunde saral pona mo ucajion de tò su i presidënc dan che i jirà te na sala a pert per n'ancunteda ufiziela di doi presidënc de Stat. Do la festa tl Kursaal uniral tenì na cunferënza stampa tla sala Ohmann.
L Cumissariat dl Guviern dajerà ora l'acreditazions n merdi 4 de setëmber dala 10 nchin la 17.30.
as
