Atualità
Pruvedimënc nueves per sustenì l’economia
USP - Per sustenì l’economia à la Jonta provinziela dat pro de plu pruvedimënc nueves. Do che i assessëures ie bele ruvei a una co judé l export y l ciamp dl frabiché, iel (NCUEI) ai prim de utober unì dat pro de ngrandì l fond de rotazion, de nia plu sustenì i patrons ma la strutures y de lascé do chëutes per sëntes nueves de firmes.
I pruvedimënc per sustenì l'economia dai pro tla prima senteda de utober reverda na segonda pert de pruvedimënc che unirà pona ntegrei tla lege finanziera nueva. L fin zentrel de chëst iede, ie chël de seguré de plu stieres.
„Tl daunì ne ulons nia plu sustenì l patron, ma la strutures. A chësta maniera schivons de judé plu iedesc ala medema firma y on la garanzia che l sustëni resta a bën de n cër fin economich" à dit l presidënt Luis Durnwalder. L fond de rotazion dëssa unì ngrandì de 60 milion de euro.
Acioche firmes gëure sëntes nueves y debe da lëur, sënta la Jonta provinziela sun l lascé do chëutes. Per firmes che pieta stieres per lëures de cualifica auta, ulëssen lascé do la chëuta IRAP per nchin a cin ani. Firmes che tol su lerneri dëssa unì premiedes cun n cuntribut. "On udù che la firmes ne tol nia plu drë su lerneri y nsci ulons judé do de chësc vieres" à dit l presidënt dla Provinzia.
L'ena passeda ova la Jonta provinziela dat pro de judé tl ciamp dl frabiché cun n sustëni di ressanamënc de cëses ti zëntri di luesc. Al sustëni dl export uniral dat de plu scioldi a na maniera da miuré la tueda de marcieies nueves, da se prejenté sun fieres y cumpanië vijitadëures che vën da caprò. Per l export iel leprò mo unì udù dant de sëurantò garanzies de nchin a 80% dl valor dla marcanzia.
as
