Atualità
Sëurandà lëures per slargë la streda de Gherdëina
Tl Assessorat provinziel ai lëures publics iel (NCUEI) ai 27 de setëmber unì sëurandat i lëures per slargë l stradon de Gherdëina da Pruca ite, tl raion “Villnad”. La ncëria ti ie jita ala firma Oberosler SF de Bulsan.
![](/news/img/lazy.gif)
Trëi chilometri dedite da Pruca, ulache pea ora la streda per Solaion, fovel bele unì fat doi puenc nueves y slargià la streda per garantì n miëur culegamënt per ruvé te Gherdëina. Śën iel unì sëurandat i lëures per realisé la terza pert di lëures de miuramënt dla streda tl raion “Villnad”.
L se trata de slargë la streda sun n toch de feter 170 metri che ie drët strënt. “Te chësta luegia se stënta doi majeri mesuns sciche na curiera o n camion dassënn a passé via, y riesc vëniel a se l dé codes de auti” mutivea l Assessëur provinziel ai lëures publics l bujën de chësc ntervënt. La firma Oberosler SF de Bulsan ova pità n priesc 17,9 percënt plu bas dla soma scrita ora y à aldò di criteries de valutazion venciù l cuncors per la realisazion.
Per pudëi slargë la streda al chilometer 3,2 da Pruca ite muessel n iede unì metù micropei per fé su n mur nuef de sustëni. Pernan che sarà passà l tëmp tecnich de 35 dis, puderà la firma scumencé cun i lëures. “Per ruvé permez dessot pert dla streda, ulache ruva i micropei, uniral fat na pitla rampa y a chësta maniera uniral scumencià i lëures a na maniera da nia mussei saré la streda ntan i lëures” spiega l Assessëur ai lëures publics.
Per miuré la streda de Gherdëina sun chësc terzo lot fej la Provinzia na nvestizion de 647.000 euro che tol ite la preparazion tecnica, la despuscions y i lëures.
L ie plu de diesc ani che te na culaburazion danter Servisc provinziel per la stredes, i chemuns y la Repartizion per nfrastrutures de stredes vëniel cialà de slargë i prim chilometri dla streda de Gherdëina da Pruca ite. Tl raion “Villnad” fovel i ultimi ani unì zarà ju l vedl mulin y slargià la streda. Davia che l puent fova tlo plu strënt dla streda cumededa, univel a se l dé n pont de pericul a furné oravier. Nsci iel dan trëi ani unì fat doi puenc nueves y slargià la streda. (USP)
as