Atualità
Lege sön la mobilité, löm vërda dal Consëi di Ministri
Le Consëi di Ministri á dé incö (ai 15 de jená) süa aprovaziun ala lege provinziala nöia sön la mobilité publica. „Da sëgn inant sarál poscibl da scomencé la reorganisaziun dl setur dla mobilité te Südtriol y da cherié na regolamentaziun unitara por döta la materia“, sotlignëia l’assessur provinzial Florian Mussner.
La lege nöia aproada sëgn ince dal Govern é le resultat dla partezipaziun de plü grups d’interes, dl laur prezius di ofizi competënc y de n test formulé te na manira tlera y scëmpla. „Chësta lege é na buna basa por garantí inant le livel alt dla mobilité publica tl Südtirol y dla cualité di sorvisc dles corieres, ferates y dles furnadoies locales“, dij l’assessur Mussner. I sorvisc dl trasport publich, sön la basa dla normativa europeica, ne gnará tl dagní nia plü assegná tres conzesciuns mo al gnará fat bandides por i raiuns interessá sciöche preodü dala legislaziun europeica. Implü ne gnarál nia ma conscidré le prisc dl’oferta mo ince te na manira particolara la cualité dles prestaziuns. I sorvisc dles ferates, dles corieres, dles furnadoies y de atri sorvisc de linia ajuntifs (sciöche le Nighliner o i Skibus) podará gnis scric fora separatamënter.
N vantaje important é ince por Mussner la poscibilité da avëi a desposiziun da sëgn inant de plü stromënc de planificaziun: le plann provinzial dla mobilité ará insciö na dorada de diesc agn y sará la tlé por podëi stabilí les arees d’interes por l’assegnaziun di sorvisc. La lege nöia ti dá ince n gran pëis al sozial, insciö l’assessur Mussner, deache ara conscidrëia te na manira particolara i interesc di anuzadus, di lauranc dl trasport publich y dl’ecomonia locala. „Cun la lege nöia orunse dantadöt ince promöie la concorënza danter les imprejes y ti garantí ai zitadins n sorvisc de cualité cun prisc adatá“, stlüj jö l’assessur por la mobilité.
I proscims vari sará sëgn l’elaboraziun de n regolamënt d’atuaziun por le plann provinzial dla mobilité. Dal mëis de novëmber dl 2018 inant él preodü spo la surandada di sorvisc dl trasport publich cun i contrac nüs, aladô dles diretives europeiches.
rc
