Atualità
Dala Junta: ok al master trienal de viticoltöra y enologia
La Junta provinziala á aprové incö (ai 2 de forá) l’ordinamënt didatich dl master trienal dal inom “Viticoltöra, enologia y produziun dl vin“ dla Facolté de Sciënzes y Tecnologies dla Université Lëdia de Balsan.
De jená á l’Université Lëdia de Balsan aprové l’istituziun de n master trienal nü che dess pité na formaziun spezialisada ti seturs dla viticoltöra, dl’enologia y dla produziun dl vin. Chësc percurs de stüde prevëiga ince na colaboraziun danter la Facolté de Sciënzes y Tecnologies dla LUB y les Universités de Udine, Padua y Verona. Incö (ai 2 de forá) á la Junta provinziala aprové l’ativaziun dl curs de spezialisaziun dla dorada de trëi agn. L’acordanza cun la Provinzia é nezesciara denant co podëi damané do l’autorisaziun finala tres n decret ministerial.
Sön le program sarál le pröm ann leziuns coletives cun d’atri studënc a Padua por passé daldô a Balsan, olache al gnará aprofondí les carateristiches dla viticoltöra da munt, „che é por le Südtirol, raiun dai vins de cualité ezelënta, n setur tres plü important“, á splighé incö le presidënt dla Provinzia Arno Kompatscher do la sentada dla Junta.
N’atra atraziun dl curs é che de plü ativités podará gní fates foradecá. Por merit de acordanzes cun d’atres Universités sarál insciö poscibl por i studënc da se formé inant a Montpellier, Geisenheim, Wiesbaden, Lisbona y Madrid.
Le curs de laurea á sciöche obietif chël da completé la formaziun di laureá che ó amplié sües competënzes ince ti seturs dl management, dla gestiun aziendala y dl marketing. Implü él ince na buna preparaziun por garantí i standarg de cualité südtirolej ti seturs che reverda la produziun de öa, süa trasformaziun te produc y la venüda di vins daldô.
rc
