Atualità
Dala Junta: compensaziuns ambientales BBT, plü sigüda la statala a Mauls
La junta provinziala á aprové incö (ai 23 de forá) le schema dla convenziun dla sozieté Brenner Basistunnel BBT SE y la Provinzia por sistemé la statala 12 a Mauls tl Comun de Freienfeld. I intervënc de mioramënt de indöt 1,8 miliuns de euro toca pro le program dles mosöres de compensaziun ambientala preodüdes por la realisaziun dl tunel de basa dl Prener.
La junta á autorisé l’assessur por i laurs publics Christian Tommasini da sotescrí la convenziun cun i ad Konrad Bergmeister y Raffaele Zurlo dla “Società Galleria di base del Brennero BBT SE”. La convenziun regolëia les modalités d’adoranza dl contribut che la sozieté BBT paia sciöche compensaziun ambientala por la costruziun dl tunel de basa. "Tl caje spezifich vëgn le contribut investí a Mauls tl Comun de Freienfeld. Cun i fonds dl BBT gnarál fat laurs por sistemé la statala 12 y aumenté la segurëza dl trafich de auti y jënt che vá a pe", á recordé le presidënt dla Provinzia Arno Kompatscher tla conferënza do la sentada dla Junta provinziala.
Les mosöres prevëiga danterater la reduziun dla velozité di veicui, la realisaziun de percursc pedonai, sciöche marciapisc y passaji, le mioramënt dl sistem de desgorta dles eghes de na pert dl trassa. Le cost total di laurs é de 1,8 miliuns de euro.
Les carateristiches prinzipales di intervënc tecnics é la realisaziun de n’isola che despartësc sides a nord che a süd de Mauls por arbassé la velozité, le mioramënt dl coliamënt cun la strada comunala, la demoliziun y recostruziun dl punt sutra le rü, la sostituziun dl punt da jí a pe cun n marciapisc integré dl punt nü, la sistemaziun dles fermades dl bus cun realisaziun de n’isola zentrala por mioré le passaje da jí a pe. Implü prevëiga i laurs da fá danü zirca 300 metri de marciapisc y la realisaziun de n passaje da jí a pe dlungia le Hotel Staffler.
La realisaziun dl proiet dl BBT prevëiga indöt 50 miliuns de euro sciöche compensaziuns ambientales da adoré cun proiec aposta a bëgn di Comuns interessá.
osp
