Atualità
Sajun da d’invern 2016/17: Diesc implanc portamunt nüs
I cinch lifc dai scagns y implanc a cabines y i cinch lifc da se lascé trá nüs é en funziun. Danter chisc ince n lift nü a Antermëia y un sön Plan de Gralba.
„Al é dër positif che al é sté meso da stlü jö i laurs de realisaziun di implanc portamunt nüs dan le scomenciamënt dla sajun da d’invern“, dij l’assessur por la mobilité Florian Mussner. De conseguënza é düc i cinch lifc dai scagns y implanc a cabines sciöche ince i cinch lifc da se lascé trá en funziun. „Dantadöt i lifc da se lascé trá ti pici zëntri di paisc á n’importanza soziala dër alta, deache ai ne favorësc nia ma l’imparé da jí cui schi mo ince les incuntades danter les generaziuns“; insciö Mussner.
„N ater fatur important é che i investimënc tl setur dles furnadoies é de gran valüta por la cualité de vita di zitadins y dl turism“, spliga l’assessur por la mobilité. I investimënc tles furnadoies á insciö conseguënzes positives por l’economia locala sciöche ince por i posć de laur deache ai á na funziun portanta dl turism da d’invern, insciö l’assessur. „Les funadoies é i mesi de trasport cun na gran richëza de tradiziun, de inovaziun y che respetëia l’ambiënt y porta para n davagn anual de söporjö 290 mliuns de euro“, sotlignëia Mussner.
Por ci che reverda les döes valades ladines él gnü realisé l’ann passé le lift da se lascé trá tl zënter de Antermëia y le lift da scagns „Gran Paradiso“ sön Plan de Gralba. Al é le secundo lift cun 8 posć da se senté scialdá sön un n scagn te döta la Talia.
Dötadöm, recorda le diretur dl Ofize Furnadoies Markus Pitscheider, che al é gnü investí tl 2015 indöt 45 miliuns de euro te furnadoies, ne conscidran nia les pistes dai schi, i implanc da fá nëi, i mesi da se möie sön la nëi y d’atres infrastrotöres.
usp
