Atualità
San Ciascian, sborlada la dezijiun sön la conzesciun da frabiché
L’anulamënt de na conzesciun da frabiché a San Ciascian é gnü bloché dala Junta do n arat dl’Avocatöra provinziala. Sborlada la dezijiun.
N arat dl’Avocatöra provinziala á oblié la Junta provinziala da se tó ciamó tëmp en cunt dl anulamënt de na conzesciun da frabiché relasciada dal Comun da Badia a bëgn de Paolo Pizzinini, Hugo Pizzinini y Rosa Alpina srl por la realisaziun de na sënta nöia de n lüch da paur stlüt (stala, parincinch y ciasa d’abitaziun) tla localité de San Ciascian. „La dezijiun – á splighé l’assessur competënt Richard Theiner – é gnüda sborlada, ince deache i messun valuté chësc arat nü, che ti vá adincuntra al arat de n stüde legal inciarié por cunt dl’aministraziun comunala, aladô de chël che l’iter d’aprovaziun dl Comun de Badia resultass legitim.“
La chestiun nasc tl ann 2010 cun la pröma domanda refodada dai ofizi provinziai rovan spo ai 10 de ma dl 2016 cun l’aministraziun comunala che relascia la conzesciun da frabiché sön chëra che al vëgn presenté n recurs (da Luca Crazzolara, Vito Agreiter y Christian Crazzolara) por la mancianza eventuala dles condiziuns urbanistiches por consintí la creaziun dla cubatöra da frabiché al intern dl vërt agricul. Le recurs vëgn aprové dala Comisciun provinziala Natöra, paesaje y svilup dl teritore cun n arat che é obligatore mo nia liënt, y insciö él le Comun de Badia che presentëia n arat legal ajuntif che vëgn conscidré varënt dal’Avocatöra provinziala. Por chësta gauja á la Junta provinziala tut la dezijiun da sborlé l’anulamënt preodü dla conzesciun da frabiché por podëi valuté ciamó plü a funz la chestiun.
usp
