Atualità
Toponims ladins: Chertes ortofoto dl Chemun de Sëlva dan man
La Chertes ortofoto dl Chemun de Sëlva ie unides prejentedes ai 31 de mei tl Tublà da Nives te Sëlva.
![](/news/img/lazy.gif)
Cun la publicazion dla Chertes ortofoto dl raion cumenel de Sëlva se stluj ju n gran lëur de nrescida scientifica y de documentazion grafica di toponims y microtoponims dl Chemun de Sëlva. La prejentazion dla documentazion scientifica di toponims dl Chemun de Sëlva ie unida a se l dé ai 31 de mei tl Tublá da Nives te Sëlva. “Canche l se trata de de mëndri ridli, raions o troies, o nce de majeri toponims, iel de mpurtanza fundamentela per la cultura y tradizion ladina che i inuemes ladins vënie mantenii per pudëi nce unì adurvei dala populazion y dala generazions che vën docà”, dij l assessëur per la cultura ladina Florian Mussner. Nriescer nosta ravises a na maniera scientifica y les cunservé ie un di duvieres plu mpurtanc dla istituzions cultureles de nosc raion, cun n prima linia la Lia Cultura y Usanzes y l’Istitut ladin Micurà de Rü, che à fat cun chësc lëur na nrescida storica de gran valuta che restarà sciche bën imateriel per duta nosta culetività, nsci Mussner.
L ambolt de Sëlva Roland Demetz à ënghe auzà ora l gran lëur dovia, che à purtà ala publicazion, sotrissan nce che per merit dla bona culaburazion cun la Provinzia saral mesum da partì ora a uni familia de Sëlva na copia dla chertes ortografiches. I atëures dla colezion di toponims y dla criazion dla chertes Josef Mussner y Anton Senoner à pona prejentà l percors dla criazion de chësc documënt mpurtant y de coche l ie unida a se l dé la colezion di toponims.
Sun la chertes iel unì abinà adum ntëur 1600 inuemes. La nrescida sun i toponims ie de gran mpurtanza per na mendranza linguistica, dantaldut per si identità culturela. Tl raion ladin vën i inuemes di posć dant tla gran pert per ladin. Per i majeri toponims (chemuns, ridli) iel nce curespundënzes tudësces y talianes. Dla nrescida di toponims per la cherta dl Chemun de Sëlva se à cruzià na grupa de lëur, che tl mëterman fova metuda adum da 15 persones, ma canche la jiva de tué do te archifs y te biblioteches y de jì a damandé do plu avisa a jënt de tëmp, nen fovel mé plu restà cater: Otto Mussner, Josef Mussner, Paul Senoner y Anton Senoner.
Pra i inuemes dla pizes di crëps y dla montes à judà pea i mëinacrëp. L Istitut Ladin Micurà de Rü à giapà la ncëria dal Chemun de Sëlva de adaté i dac per la stampa dla cherta toponomastica de Sëlva. Deberieda cun l tecnich Elmar Irsara, che se ova bele cruzià dla chertes ortofoto y toponomastiches de Santa Cristina y dla Val Badia dates ora dal Istitut Ladin, iel unì cuncià ite i dac georeferenziei sun la chertes ortofoto. Te chësc mumënt lëuren nce bele pra la chertes ortofoto dl Chemun de Urtijëi, l ultim di chemuns ladins che mancia mo per pudëi stlù ju per ntant l proiet dla toponomastica ladina che ie na priorità mpurtanta per l Istiut Ladin Micurà de Rü.
USP