USP – L stradon de Gherdëina danter S.Cristina y Sëlva vën ncuei (vënderdi 5 dezëmber) inò giaurì al muvimënt di auti. Per via de lëures ala streda de zircunvalazion nueva de S.Cristina oven messé s’aré l stradon tl raion Dorives. L prim toch dla streda de zircunvalazion nueva unirà giaurì tl ann nuef.
l punet da Dorives a S.CristinaAdrët per l prim fin dl’ena che gëura la sajon da inviern, gëura ncuei vënderdi sëira nce l stradon de Gherdëina riesc dedite da S.Cristina. „Ntan chësc fin dl’ena se aspieten l prim gran muvimënt dl inviern y son cuntënt che ne messon nia plu avisé ora auti, curieres y camions per Plan da Tieja“ spiega l assessëur ala stredes Florian Mussner. La stradon de Gherdëina ie stat sarà tl raion Dorives per anjenië l ncrëusc cun l puent nuef dla streda de zircunvalazion. De utober oven batù tres l tunel Saslong, che passa sota l purtoi dai schi. Dopro iel riesc unì njenià l puent de 36 metri, che arjonj tl pont pu aut, 10 metri da fonz. L prim toch dla streda de zircunvalazion de S.Cristina unirà giaurì tl ann nuef. Per via dl frëit che ie stat de nuvëmber y dla nëif de chëst ena ne iesen nia boni de finé provisoriamënter la streda dala raida de Greva nchin da Ruacia. „Rengrazi dantaprima i lauranc che à tenì permez a lauré cun gran frëit y nëif per chësta streda. Son cuntënt sce puderon mo ntan chësta sajon da inviern lascé furné provisoriamënter sun l prim toch dla streda nueva“ dij l assessëur Mussner. La streda de zircunvalazion de S.Cristina ie 1.660 metri longia. Cun doi tuniei y cater puenc per n custimënt de ndut de feter 30 milon de Euro, iel unì fat n gran nvestimënt per la cualità de vita di zitadins de S.Cristina.
