Atualità
Jonta provinziela nueva: sëurandata dla cumpetënzes
USP – Sën iel ufiziel: per decret dl presidënt dla provinzia Drunwalder à i assessëures provinziei ncuei (30 dezëmber) giapà la cumpetënzes per si lëur tl guviern provinziel.
L presidënt dla provinzia Drunwalder ova bele ai 23 de dezëmber fat al savëi co spartì su la cumpetënzes te jonta, ncuei ie chësta cumpetënzes unides sëurandates ufizialmënter ai 9 aministradëures.
L presidënt Luis Drunwalder ie nce tla legislatura nueva de cumpetënza per cuestions provinzieles cun l’Europa, i servijes zentrei dl’Aministrazion provinziela, chemuns, sport, destudafuech, prutezion zevila, frabiches per l’ega, ciacia, pescaria y bòsc, cun l zënter sperimentel.
L prim vizepresidënt Hans Berger ie respunsabl per l’agricoltura, la furmazion prufesciunela per l’agricoltura, lëur tl bosch y te cësa. Berger ie nce prim aministradëur per l turism, liber fundier y cataster.
Segondo vizepresidënt ie l assessëur nuef, Christian Tommasini, a cë dla scola y cultura de rujeneda taliana, y dl frabiché abitatif. Leprò ti iel mo unì dat la rejon de rujené pea n cont di museums.
La cumpetënza di museums ie dl’assessëura Sabina Kasslatter Mur. Che à nce giapà da aministré la scola y cultura de rujeneda tudëscia, la cura di monumënc y l’università. L assessëur Michl Laimer ie nce tla legislatura nueva l prim respunsabl per l’urbanistica, l’ambiënt, l’energia y la defendura dla natura y dla cuntreda.
L assessëur ladin Florian Mussner resta nce per i proscimi cin ani de cumpetënza per la scola y cultura ladina cun l lëures publics. Da nuef ie la cumpetënza per l avëi dla Provinzia de Bulsan.
L’assessëura nueva Barbara Repetto ie aministradëura dl dipartimënt per l bilanz y finanzes, nrescida, svilup y inuvazion. Si cumpetënza ie nce la furmazion prufesciunela de rujeneda taliana, l’informatica, l lëur y la coordinazion n cont dl’imigrazion. Ëila à nce la rejon de rujené pea n cont dl fond soziel europeich.
L assessëur Richard Theiner mantën la cumpetënza per la sanità y l soziel. Da nuef ie per ël l ciamp dla familia.
Thomas Widmann ie assessëur per i ciamps economics dla ndustria, cumerz y artejanat. Te si assessorat iel nce la mubilità y l personal.
as
