Atualità
Mostra „Women in art“ gëura ai 2 de auril a Urtijëi
USP – Cater scoles autes à laurà cater ani tl proiet europeich d’ert “Women in art”. N juebia 2 de auril uniral giaurì na mostra de chësc proiet tl Zënter per ert y cultura a Urtijëi. Te “Women in art” se tratela dla maniera de esprescion creativa y d’ert dl’ëila.
La Scola d’ert “Cademia” de Urtijëi y Soraperra de Poza de Fascia, l Gymnasium tecnich “Gottlieb Daimler” de Sindelfingen a Stuttgart y l Gymnasium de Piran tla Slovenia se à dat ju ntan i ultimi trëi ani cun l proiet europeich “Comedius” cun referimënt al’ëila tl ciamp dl’ert. Nsenianc y sculeies ti ie jic do ala dumanda de ciunes che ie la particulariteies y la dificulteies de ëiles sun si streda dl svilup creatif. Cie sustën pa l prozes creatif dl’ëila?
Sun l argumënt iel n iede unì laurà sun la pert teorica y pona iel nce unì fat pertes pratiches-artistiches.
I lëures vën śën prejentei al publich tla mostra “Women in art” che gëura
n juebia, 2 de auril 2009, dala 19.00
tl Zënter per ert y cultura, sun plaza S.Antone a Urtijëi.
La giaurida unirà tenida dal ntendënt ala scoles ladines Roland Verra, dal diretëur dla Scola d’Ert de Urtijëi Karlheinz Mureda y dala presidënta dla Lia Mostra d’Ert Jessica Insam. Te chësta ucajion uniral nce prejentà l catalogh dat ora per l proiet “Women in art”.
La mostra tl Zënter per ert y cultura a Urtijëi sarà da udëi nchin ai 12 de auril, uni danmesdì dala 10 ala 12 y domesdì dala 4 ala 7.
as
