Atualità
N lunesc vën la televijion digitela ti luesc ladins
USP – N lunesc che vën, ai 9 de nuvëmber scumëncia te Gherdëina y tla Val Badia l tëmp dla televijion digitela. La mudazion de trasmiscion dal sistem analogh al sistem digital tla Provinzia de Bulsan ie ntan la prima ena jit avisa do program. Nsci puderà nce unì tenì ite la data prugrameda per luesc ladins.
Nce sce ie unida la nëif à i tecnics dla stazions de televijion y dla RAS (che se cruzia di programs tudësc da oradecà), pudù lauré inant pra l’antënes sun la motes y ëures dla valedes. Di per di iel ti raions defrënc unì mpià l signal digitel y destudà ju l sistem de trasmiscion analogh. N lunesc, 9 nuvëmber, sarala tan inant nce tla Val Badia y te Gherdëina.
Cun la trasmiscion televisiva digitela giateran na miëur cualità tl udëi y audì, mplu saral mesun giapé de plu programs zënza paiamënt. Per udëi i programs dla televijion tres la trasmiscion digitela iel debujen de n decoder ntegrà tla televijion o sciche aparat a pert. Canche da n lunesc ai 9 de nuvëmber sarala nce tan inant ti luesc ladins dla Provinzia de Bulsan, ne uderan nia i programs sce n ne fej nia muever la crida automatica.
De plu nfurmazions sun la mudazion dla trasmiscion televisiva o co che n chier da nuef i programs de televijion ie nce da giapé tl internet sota www.provinz.bz.it/digitaltv y sota www.ras.bz.it ulache l ie nce la nfurmazions tla rujeneda ladina. Aiuc tres nfurmazion possen mplu damandé cherdan su la RAS (0471 546666) o la RAI (0471 902444, 0471 902445).
as
