Atualità
Lungiarü, Rina y Pidrô sön le program provinzial dles strades 2011
USP – La strada da San Martin a Lungiarü, chëra da Pidrô a La Val y la strada da Rina é i majeri laûrs che l’Assessorat provinzial por i laûrs publics se à tut dant por le 2011 tla Val Badia. Sön proposta dl assessur Mussner à la Junta provinziala impormò dè pro le program general di laûrs sön les strades por l’ann 2011.
![](/news/img/lazy.gif)
Por l’aisciöda él odü danfora de mëte man de dortoré la strada danter San Martin y Lungiarü. La strada é śëgn 4 metri leria y canche n auto incunta n camionn o n majer meso, se stonton da passè. L’Ofize tecnich strades à laurè fora n proiet por deslarié y avalié la strada danter le chilometer 4,0 y 5,5. Aladô dl proiet dess la trassa dla strada restè feter anfat. Aladô dles condiziuns geologiches gnaràl deslarié la strada dala pert dessura o dala pert dessot. De de plü lerch val debojëgn dantadöt tles otes. Aladô dles desposiziuns provinziales él preodü che les döes striares sides 2,5 metri leries y che al sides mez meter de ur de strada. La strada da Lungiarü arà te so punt plü ërt na pendënza de 10%. Le raiun danter San Martin y Lungiarü se damana ma te püć punć mürs de fondamënta por la strada. Por miorè la segurëza y la viabilité te chësc raiun vëgnel fat n investimënt de indöt 925.959 euro da pert dla Provinzia de Balsan.
I laûrs por dortoré la strada da Rina é gnüs partis sö te trëi perts. Do che la pröm lot é bele rové n’un vara en chësc ann d’aisciöda de rové la secunda pert di laûrs. Ćiamò dan l’invern êl stè meso de mëte le pröm strat d’asfalt; ara se trata ma de rové les perts che reverda i rogns y de mëte le secundo strat d’asfalt. Da pert dl Assessorat provinzial por i laûrs publics él preodü na varianta por comedè ćiamò 350 metri de strada suraprò y de rové a chësta manira ćina al chilometer 1,6. Le program di laûrs por le 2011 vëiga inće danfora de jì inant cun la proietaziun dla terza y ultima pert dla strada da Rina. Inće te chësta pert gnaràl deslarié la strada a na moda che inće i majeri mesi pois arjunje le paîsc zënza dificoltês y dantadöt por garantì plü segurëza sön strada.
N majer investimënt por la segurëza de chi che va a pè é odüda danfora a Pidrô. Le pröm tòch de strada cuntra La Val gnarà deslariada y avaliada. Sön na lunghëza de 422 metri gnaràl fat n tru da jì a pè che sarà 1,5 metri lerch, por che ara vais da passè saurì inće cun i bagheli. Te chësc post passa tröpa jënt a pè por jì ala staziun dles corieres. Aladô dl program dl 2011 él odü danfora le finanziamënt dla proietaziun esecutiva de chësc laûr. Danter proietaziun, costimënt tecnich y laûrs él odü danfora n cost de 1.540.860 euro por la strada cun trottoir a Pidrô.
as