Desvalì | 14.11.2011 | 14:47

Jonta provinziela giata rejon sun la lege per i juesc de fertuna

USP – La Jonta provinziela à giapà rejon permez al Guviern a Roma n cont dla lege sun i juesc de fertuna. La Cëurt costituzionela à azetà la lege provinziela nueva per i juesc de fertuna che vëija dant na destanza de 300 metri danter sales da juech y scoles.

La lege provinziela di juesc de fertuna fova jita n drova a mez dezëmber 2010, ma me doi mënsc do ova l Guviern a Roma dubità dla conformità ala costituzion ajache l minova che l fossa de si cumpetënza. Sun na tela se ova la Jonta provinziela lascià ite te n stritoz dan Cëurt costituzionela. L presidënt Durnwalder à (NCUEI) ai 14 de nuvëmber cunedì che l ie unì recunesciù la cumpetënza provinziela tl sëurandé la lizënzes per sales dai juesc. Chëstes ne possa nia plu unì giaurides ulache mei, ma les muessa tenì cont de strutures de furmazion.

La lege provinziela defënd i zitadins a risich y fej prevenzion dla dependënza dal juech te chëla che la lizënza ne possa nia unì sëurandata sce la sala juesc ie a manco che 300 metri da scoles, zëntri per jëuni, o d’autra strutures per jëuni, o strutures sozieles y saniteres. La lizënza per pudëi pité juesc de fertuna vën data ora per cin ani. Nce chëi che à bele na tel lizënza, muessa la damandé da nuef canche la toma.

as