Atualità

Frabiché | 18.11.2011 | 13:42

I ponc zentrei de Tommasini tl bilanz provinziel 2012

USP – Passa 200 milion de euro iel per n auter ann udui dant tl frabiché soziel: cun 54 milion uniral frabicà cuatieres soziei y 90 milion unirà adurvei per l frabiché alesirà. L assessëur Christian Tommasini à (NCUEI) ai 18 de nuvëmber prejentà la prioriteies dl bilanz provinziel 2012 che reverda i cuatieres soziei, l sparanië per frabiché y aiuc per paië l fit dl cuatier.

L fin dla politica di cuatieres da pert dla Jonta provinziela ie chël che uni un dëssa pudëi abité cun denità y che l sibe n bilanz soziel. Tl bilanz provinziel iel nsci udù dant feter 210 milion per ti jì do a chisc obietives. L assessëur Christian Tommasini à prejentà co che chësc capitul de bilanz vën spartì su. 54 milon unirà adurvei per frabiché cuatieres nueves dl Istitut per cuatieres soziei IPES. Danter cuatieres nueves y cuatieres ressanei fejen cont de pudëi sëurandé n auter ann 450 cuatieres. Per lëures de ressanamënt iel per n auter ann udù dant 38 milion de euro. Tla valedes ladines uniral frabicà sies cuatieres a La Val. Per cater cuatieres soziei te Sëlva ie l grunt bele segurà.

Per l frabiché alesirà iel udù dant 90 milion de euro. L assessëur Tommasini dit che l ie daniëura dificulteies che i chemuns mëte a desposizion i grunc per cuatieres soziei, “perchël ons auzà la soma per cumpré cuatieres da 24 a 35 milion de euro”. Zënza grunc ne possel nia unì frabicà. Tommasini à fat n apel ai chemuns de se mëter riesc a desposizion i grunc.

Per l 2012 se an nce tëut dant de mëter a jì n model de sparani per frabiché n cuatier. “Chësc model va drët bën tl’Europa zentrela, la Jonta provinziela uel cun cun l model de sparani de na pruspetiva ai jëuni. L avëi n stëss n cuatier ie na segurëza soziela” à dit Tommasini.

Per n auter ann iel nce udù dant mudazion ala lege dl abité. N cont de cuntribuc al fit uelen mëter na sëida mascima de 4.800 euro. Tla lege uelen nce junté che chiche ne pea nia do n cuatier soziel toma per for ora de graduatoria.

Te chësc mumënt iesen tl lëur de anjenië l mëter adum de cuntribuc per l cuatier y chëi per l fit dl cuatier. La doi sortes de cuntribuc ie nchinamò unides aministredes te doi dipartimënc defrënc, chël per l abité y chël per l soziel. Tres la detlarazion unificheda dl davani y avëi, iel nce deventà mesun mëter adum i cuntribuc per l cuatier. De utl ie chësc per smendrì burocrazia y per adurvé miec i scioldi a desposizion.