Atualità
Jonta provinziela: Uties da mont, joi a Roma, tlausura
USP – N cuncors de ideies per trëi uties da mont, la tratatives per mëter a jì i joi a Roma y i argumënc zentrei dla tlausura dla Jonta provinziela ie unic prejentei dal presidënt dla provinzia, (NCUEI) ai 23 de jené riesc do la senteda dla Jonta provinziela.
Trëi dla 24 uties da mont che la Provinzia à sëurantëut dal CAI ie tan stletes che les muessa unì fates da nuef. Davia che la Jonta provinziela ulëssa nuzé chësta ucajion per fé unì su cunzec inuvatives, ala dat pro de scrì ora n cuncors de ideies.
La trëi uties che unirà fates da nuef ie la utia Edelraut (Mühlwald/Lappach), Schwarzenstein(St. Johann Ahrntal) y la utia Weißkugel (Graun/Vinschgau). Ai assessëures ti fovel unì metù dant proiec per fé su la uties a na maniera tlassica, ma chisc ne ie nia unic azetei. “Ncantëur tl’Elpes iel bele ejëmpli de cunzec inuvatives che va pea cun natura y cuntreda, velch da de tel ulëssen nce fé unì su tlo tl Südtirol” à dit l presidënt Durnwalder. Nscì iel unì dat pro de fé n cuncors de ideies che tën cont de architetura, defendura dla cuntreda y balanz de cunsum. I cunzec damandei muessa nce tenì cont dl custimënt che ne daussa, cun al plu 2 milion de euro, nia custé de plu che na utia tradiziunela.
Per mëter a jì i joi da Bulsan a Roma porta la Jonta provinziela inant tratatives a duc i liviei. Vel cuestion ie mo da stlarida n cont dla sozietà Air Alps.
“Nce sce la Air Alps ne fej nia plu i joi iela mo for patrona dla cunzescion per la linia da Bulsan a Roma. Perchël ti sons jic permez per ti lecurdé de si ublianzes cuntratueles” à dit Durnwalder do la senteda dla Jonta. A chësta maniera ulëssen cialé che la Provinzia posse dé inant chësta cunzescion te chëla che l Air Alps la debe ca de si bona. “Autramënter pudëssa pu ëi – n teoria – inò julé chësta linea” à dit l presidënt.
Auter pont da stlarì ie chël cun l’autorità de jol dl’Austria: ti ai pa bele tëut la lizënza ala Air Alps, ti vëniela pa mo tëuta?
Permò canche la cunzescion ie da pudëi avëi, possa la Jonta provinziela damandé a Roma de pudëi la dé inant o la scrì ora da nuef. I assessëures mëina tratatives cun Roma y nce cun la trëi sozieteies che ëssa nteres a sëurantò la linia. Dut chësc cun l fin che l vënie prësc inò pità de julé pea.
Argumënt zentrel dla tlausura dla Jonta provinziela n juebia y vënderdi, 26 y 27 de jené, ie la cunseguënzes dla liberalisazions per l Südtirol. Coche l presidënt à cunedì, uniral nce rujenà de adatamënc dl bilanz aldò dla manovra de sparani Monti y de argumënc zentrei da chëst ann.
Per dé sgors al’economia taliana sënta Guviern Monti sun la liberalisazion de de plu ciamps che à nce cunseguënzes sun la realtà dl Südtirol. “Ulon analisé plu avisa cie che pudon azeté y ulà che puderon nstës fé regulamënc tenian cont dla diretives europees” à dit Durnwalder n cont di obietives dla tlausura a Rein in Taufers.
Te chësta ucajion uniral nce tratà la cunseguënzes dla manovra de sparani per l bilanz provinziel. La ne se trata nia me dl bilanz da chëst ann, ma nce de na pruspetiva di ani do. Argumënc dla tlausura sarà nce l plan de svilup y plann urbanistich provinziel, l’energia, l sparanië per frabiché, sustëni al’economia, modiei nueves te trasport publich y reformes dl’aministrazion. La Jonta provinziela uel nce traté i argumënc che aldò de nrescides ti stà a cuer ala populazion: l sustëni ala families, smendrì l aspité per vijites te spedel, segurëza soziela y dla stiera.
La tlausura scumëncia n juebia dala 9 danmesdì, domesdì iel prugramà n’ancunteda cun l Cunsëi di chemuns y la finerà pona l vënderdi cun na cunferënza stampa dala trëi domesdì.
as
