Atualità
Plu cuatieres soziei tres l bonus de cubatura
USP – La Jonta provinziela uel sparanië grunt da frabiché auzan, aldò dl bonus per ressanamënt energetich, la cëses cun cuatieres soziei. Sciche l ie unì dat pro (NCUEI) ai 13 de fauré fajerà l Istitut per cuatieres soziei IPES ressanamënc energetics a na maniera da giapé l bonus de 20% dla cubatura sëuraprò.
Chiche fej lëures de ressanamënt per sparanië energia, arjunjan l standard de Cësa tlima C, giapa n bonus de cubatura. Chësc bonus de 20% dla cubatura dëssa aldò di assessëures provinziei nce unì nuzà tl cajo de cuatieres soziei.
Sce l se trata de majera cëses possa chësc bonus nce fé ora dut n partimënt sëuraprò. Te de tei caji uel la Jonta provinziela nuzé l’ucajion de fé cuatieres soziei nueves. L IPES ressanea feter 200 cuatieres al ann. „Sce pudon danpro via fé n partimënt sëuraprò ruvons tla zità de Bulsan a feter 100 cuatieres nueves. A chësta maniera sparanions nce grunt da frabiché“ à dit l presidënt Luis Drunwalder.
as
