Atualità
Cumiscion azetea de frabiché da nuef la mesana de Sëlva
USP – La cumiscion provinziela per la frabiches scolastiches à te si ultima senteda tëut su da nuef l proiet dla scola mesana de Sëlva. Mpede n ressanamënt, dëssel aldò dla pruposta nueva unì zarà ju y frabicà da nuef. Aldò dl’idea mandeda ite dëssel nce unì fat tlasses per la scola de mujiga.
La cumiscion per la frabiches scolastiches ova bele prugramà n ressanamënt dla scola mesana de Sëlva. Davia che l Chemun de Sëlva à prejentà n’idea nueva de zaré ju i fé su da nuef la scola ie chësc proiet śën unì tëut su da nuef tl program prinzipel. L proiet vëija dant 9 tlasses y nsci nce la lerch per l nseniamënt dla Scola de Mujiga de Gherdëina che à 205 sculeies tla sezion de Sëlva/S.Crestina. Leprò unissel nce fat na palestra. “N ie ruvei al pont de ulëi frabiché da nuef davia che chësta soluzion à vantajes dal pont de ududa funziunel y costa nce de manco” spiega l assessëur ai lëures publics Florian Mussner.
Canche l Chemun prejenterà l proiet esecutif, puderà la cumiscion provinziela nce traté l finanziamënt dl frabicat. La proietazion y i lëures vën fai dal Chemun de Sëlva.
as
