Atualità
Iscrizions ala scoles autes nchin ai 31 de merz
USP – Nchin ala fin de merz, te passa doi enes, à sculeies che finerà chësta ann la mesana mo dl’aurela de se scrì ite ala scoles autes. Chiche ne à mo nia tëut na dezijion dëssa se de jù plu a puntin cun cie che l vën pità. Tla valedes ladines iel cin scoles autes da crì ora: doi istituc tecnics economics, n lizeum liniguistich, n lizeum d’ert y na scola prufesciunela.
I sculeies dla valedes ladines à ti ultimi mënsc bele abù ucajion de vijité la scoles autes a Urtijëi y La Ila ntan i dis de porta davierta. Chiche ulëssa mo nrescì velch de plu sun la scoles autes ladines possa tò su diretamënter cuntat cun la direzion per na vijita. “Chiche se nfurmea n pue’ miec sun la scoles autes, schiva fauza dezijions” sorissea l assessëur ala scola ladina Florian Mussner, “ajache chiche chier ora la scola che va miec per ël o ëila fej n var fundamentel per si streda de vita”. Perchël vëniel cunsià de crì ora la scola do na bona valutazion.
A La Ila vëniel inò pità l Lizeum Linguistich y l Istitut tecnich economich cun la sezion aministrativa. L Istitut tecnich de Urtijëi pieta ënghe na sezion aministrativa y na sezion turistica che dà sëuraprò mo la puscibltà de pratighé sport agonistich. L Lizeum d’Ert de Urtijëi pieta trëi spezialisazions: grafica, design y ert figurativa. Per la Scola prufesciunela iel bele stat truep nteres a na maniera che l possa inò unì segurà na prima tlas. “N culaburazion cun l Lizeum d’ert vëniel tlo nce dat la puscibltà de ruvé al titul de matura” spiega l ntendënt Roland Verra.
L’iscrizions ala scoles autes possa unì fates cun n formuler che ie da giapé te uni scola. L ultimo di per pudëi se scrì ite ie la sada ai 31 de merz 2012.
Nfurmazions sun la scoles autes tla Provinzia de Bulsan ie da giapé tres internet sun la plata web www.provinz.bz.it/bildungsfoerderung/default.asp y tla publicazion “Wegweiser” dl Ufize provinziel Urientamënt scolastich y prufesciunel.
Scoles autes paritetiches ladines
Istitut tecnich y Lizeum a La Ila
telefonn: 0474-847252
www.ll-itc-laila.it
Istitut tecnich Raetia a Urtijëi
telefonn: 0471-796296
www.schule.provinz.bz.it/hob-stulrich
Lizeum d’ert cun Scola prufesciunela de Urtijëi
0471-796240 / 0471-796733
www.ks-groeden.schule.suedtirol.it
www.groeden.berufsschule.it
as
