Desvalì | 04.06.2012 | 15:48

Jonta provinziela: Inuvazion, Zelig y ustaria te stala

USP – Te si senteda da (NCUEI) ai 04 de juni à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce l program de inuvazion dl ann, l finanziamënt per jì inant cun la scola Zelig y la dumanda de pudëi fé ustaria te na stala.

32 milion per l’Inuvazion
La Jonta provinziela à dat pro l program de inuvazion cun n custimënt de 32 milion de euro. La majera pert, 19,2 milion, vën nuzeda per programs de tueda y svilup coordinei dala Provinzia. Per la firmes singules iel udù dant 1,5 milion, 5,9 milion per l zënter de inuvazion tecnologia y 5,1 milion per istituc de cunsulënza sciche l Fraunhofer Institut.

Mantenì la Zelig
Do avëi analisà la situazion dla scola de televijion Zelig, à la Jonta provinziela dat pro de la mantenì. Chësta scola se à fat n bon inuem nce oradecà. I jëuni che vën tlo nseniei ju a fé televijion, film documenteres y lauré cun i media nueves, vën al 50% dal Südtirol y 50% da oradecà. La furmazion dura trëi ani y te uni grupa iel feter 30 sculeies. L’analisa à mustrà su che feter duc chëi che à finà chësta furmazion à nce giapà da lëur. “La Provinzia sustën la scola Zelig cun 1.350.000 euro per l proscimo curs che dura trëi ani” à dit l presidënt Durnwalder.

Deguna ustaria te stala
La Jonta provinziela ne à nia azetà la dumanda de n paur sun Mont Sëuc che ulëssa dé ora de bever te si stala dala cëures, d’instà canche la cëures ie sun pastura. “Chësc pudëssa deventé n cajo de prezedënza, perchël ne lascions nia pro esperimënc de chësta sort” à dit l presidënt dla Provinzia.

as