Sanité / Sozial | 11.07.2012 | 16:39

L vën cris families de cura

USP - Te chësc mumënt iel 291 mutons y mutans che possa viver pra families de cura. Ma la cumpëida de genitores che ie desposc’ a tò su per n pez mutons o mutans d’autra families che à problems, va do ju. Tlo uelen judé cun na campania per furmé cuscienza, metuda a jì dala repartizion per familia y soziel, y prejenteda (NCUEI) ai 11 de lugio dal assessëur provinziel Theiner.

Families de cura pieta scunanza y sté miec, sce la va bën nchin che la situazion tla familia uriginera se à miurà. “La familia de cura muessa vester cuscienta che l pudëi inò jì de reviers tla familia uriginera à la priorità plu auta” à dit l assessëur Theiner pra la prejentazion sorissan che la se trata de n duvier zentrel dla cumenanza: “Chiche se cruzia de n mut, se cruzia per l daunì”.

Tl Südtirol iel 291 mutons che vif pra families de cura. Ma l ne n devënta for de manco. Dan passa doi ani fovel mo 142 genitores de cura, śën nen iel me plu 106 che à tëut su n mut o na muta. Cun na campania per furmé cuscienza, cun nserac y spots tl radio, uelen arjonjer na majera despunibltà da pert dla populazion. La Provinzia da ora 1,7 milion de euro per chësc ciamp. L sustëni finanziel per la families ie aldò dl assessëur provinziel plutosc megher, ma l ne possa nia vester la rejon prinzipela per tò su n mut. Na familia giata 612 euro zënza tenì cont dl davani, 489 euro sce l se trata cialé a mez tëmp cun passa sies ëura al di y 326 euro cun manco de sies ëura.

L cialé de mutons o mutans ne ie nia da se falé cun n’adozion. N iede vëniel cialà de lascé l mut pra la familia nce sce l ie problems, l var che vën do ie pona de crì na familia de cura y pona permò vëniel tëut n cunsciderazion la puscibltà de na cësa per mëndri.

as

Galaria dales fotografies

L vën crìs families de cura: (d.m.d.) l diretëur de ufize Bizzotto, l assessëur Theiner, l’oma de cura Moratti y l assistënt soziel Lantschner pra la prejentazion dla campania;

Downloads