Atualità
Ancunteda Napolitano – Fischer: respeté la normes de Autonomia
USP – Mo dan pië do la uneranzes dl Südtirol, se à i presidënc dla Talia y dl’Austria Giorgio Napolitano y Heinz Fischer ancuntà te na sala a pert dl Kurhaus de Maran. Dopro à Napolitano detlarà de stimé la despunibltà dla Provinzia de judé a ressané la finanzes stateles, metan a cuer che l’Autonomia muessa unì respeteda. Sun la situazion atuela danter Bulsan y Roma à nce tëut posizion l presidënt Fischer.
La Talia muessa fé sacrifizi per valivé la bilanzes de stat, „ei perchël gran stima per la Provinzia de Bulsan che ie desposta a judé pea. Chësc uel di che la azetea de tré ite de manco" à dit Giorgio Napolitano, (NCUEI) ai 05 de setëmber a Maran. N cont dla maniera de co che Bulsan tën pea cun Roma iel de gran mpurtanza che vënie respeteda l'Autonomia à dit l presidënt dla Talian. Chësc unirà bele cuncretisà n luesc a Roma te n'acunteda danter reprejentanc de Stat y Provinzia.
Sibe la Talia che nce l'Austria ie te n situazion che les sforza a pruvedimënc de sparani y che les debe na sburdla al'economia. De canche l'Austria fajerà n ntervënt per judé l Süditol à Fischer respundù che ël nterpretea l'Acurdanza de Milan a na maniera che la ne vel nia per for, ma nchin a canche l ie debujën de tratatives nueves. „Perchël iel te chësc mumënt n problem de tratatives danter Bulsan y Roma, na cuestion finanziera de cumpetënza de Südtirol y l Stat Talian.
Tla cunferënza stampa do l'ancunteda à Fischer nce tëut posizion sun la grazia per i ativisć dl Südtirol. A livel juridich ne possel nia unì fat vares nchin che la persones n cuestion de feje nia nstësc vares per se damandé la grazia. De chësta minonga ie tramedoi presidënc de Stat.
N cont dla gran defrënza de crëta che l ti vën dat ai tituli de stat dla Talia y Deutschland à Napolitano respundù che chësta situazion ne spidla nia la realtà: „chësc ie n gran problem per la munëida dl Euro". Fischer à juntà de aspité sun tendënzes positives che possa unì dala sentedes nternaziuneles di proscimi dis y pona dala veles tl'America, tla Talia y tl Deutschland. Ël ne uel nia cunedì mo de plu chësta stima true' massa stleta per i tituli de stat.
as
