Atualità
Les tematiches dl mëis dl’Euregio
USP - Mëis por mëis pon ciafè noeles desvalies y atuales sön la plata internet ofiziala dla Euregio, le proiet de colaboraziun y de barat sozio-cultural danter les Regiuns dl Tirol, dl Trentin y dl Südtirol. Les novitês reverda porsones y posć interessanć, sciöche inće tesć iuridichs da descurì. Chësc mëis pon ciafè sön le portal dla Euregio por ejëmpl chisc argomënć: le Ćiastel de Vestmezia, na fortificaziun sön le confin danter la Svizera, l'Austria y la Talia, le diretur dl festival di films da munt de Trënt, Roberto De Martin, y la Convenziun dles Alpes.
Le Ćiastel de Vestemzia é da ciafè al dedaincö sön le confin danter la Svizera y l'Austria, plü avisa danter le Tirol y i Grijiuns, y dër daimprò al Südtirol. La fortificaziun, che ê stada dal 10ejimo secul inant na sënta dl tribunal y tratan le 17ejimo y 18ejimo inće tl zënter de combatimënć sön le confin, fej pert dla storia europeica. Al dedaincö é le Ćiastel de Vestmezia deventè n simbol por la convivënza y la concordanza danter i paîsc confinanć, inće por via dla colaboraziun dles trëi Regiuns tres le program europeich Interreg por le ressanamënt dl ćiastel. Le Ćiastel é insciö deventè inće n post cultural che al paia la mëia da aprofondì y studié. Chi che ô avëi de plü informaziuns po jì a ćiarè do chilò: (DEU) o (IT)
Por ći che reverda la chestiun iuridica dl mëis ilustrëia le secretêr general dla Euregio, Markus Reiterer, sön la plata internet, la Convenziun internazionala dles Alpes y porta dant plü avisa les conseguënzes dla Convenziun dles Alpes por le raiun dl'Euregio. Por nen savëi deplü pon ćiarè do chilò: (DEU) o (IT)
La porsona dl mëis dla Euregio é chësc iade Roberto De Martin, Presidënt dl festival di films da munt de Trënt. Le grup de laûr por i films dla Euregio é jü a le ciafè tratan le festival y à insciö podü ti dè n'odlada ala manifestaziun. La tematica dla incuntada ê inće la colaboraziun di festivai dl film de Trënt, Balsan y Desproch, tres tl'otica dla Euregio. Les porsones interessades ciafa chilò de plü informaziuns: (DEU) o (IT)
La plata internet ofiziala dl Euregio por: (Todësch) o (Talian) o (Ladin)
rc
