Atualità
Dala Junta: punc logistics nüs a Al Plan, Bornech y Braies
I cantiers dl Sorvisc strades de Bornech/San Laurënz, Braies y Al Plan gnará miorá y modernisá por che ai sides plü efiziënc. Chësta é la dezijiun che la Junta provinziala á tut incö (ai 15 de dezëmber): la deliberaziun presentada dal assessur Florian Mussner prevëiga che al vëgnes metü a desposiziun 3,6 miliuns de euro.
"Por mirit dla realisaziun di frabicac nüs – spliga Mussner – metarunse a desposiziun dl Sorvisc strades les lercs che vá debojëgn por gestí le miú che ara vá i intervënc sön n valgönes trasses prinzipales dla rëi locala, sciöche ince por garantí na miú manutenziun di mesi y atrezadöres. Les strotöres atuales ne respetëia nia plü i standarg por garantí la mascima cualité dl sorvisc."
La Junta provinziala á porchël aprové incö (ai 15 de dezëmber) le program planivolumetrich por trëi punc logistics nüs: por chël de Bornech/San Laurënz él preodü 1,4 miliuns de euro, y i intervënc sön n total de 3.600 metri cubics reverdará la costruziun dl magazin por l’atrezadöra, le magazin y le salf dl cantier. La medema zifra (1,4 miliuns) mo partita sö sön 5mila metri cubics vëgn indere metüda a desposiziun por le punt logistich de Braies, olache al gnará ressané le magazin dl’atrezadöra y le salf, deperpo che a Al Plan sará l’investimënt de 840mile euro (2.300 metri cubics). Ince te chëst’ultima strotöra él preodü la costruziun dl magazin y dl salf, ajache i locai da sëgn é di agn ’80 y, aladô di tecnics, ési te de stletes condiziuns.
L’assessur Florian Mussner tol l’ocajiun por laldé "le laur de che che ciara da agn da ti garantí a che che vá cun l’auto y ai atri les mius condiziuns de segurëza sön i 2.800 km. gestis dala Provinzia, n 'patrimone' anfat ala destanza danter Balsan y Mosca. Por mirit di punc logistics nüs– stlüj jö Mussner – orunse pité inant i mius standarg de cualité y segurëza ti intervënc de manutenziun dles strades, strotöres fondamentales por la arjunje le teritore y por le svilup de nüsc paîsc y nostes cités."
rc
