Atualità
Mobilité, Mussner y Felipe: „Mioré i coliamënc transfrontaliers“
La colaboraziun danter le Südtirol y le Tirol, tl setur dla mobilité, reverda en gran pert i coliamënc transfrontaliers. Y ara mëss le fá tres deplü, dantadöt te na perioda storica te chëra al vëgn indô rajoné de barieres ai confins. Sön chësc é a öna i assessurs provinziai Florian Mussner y Ingrid Felipe che s’á incunté incö (25 de forá) a Desproch.
„Cina dan da presciapüch 15 agn ê nostes döes provinzies destacades da n confin, aldedaincö é Balsan y Desproch rovades tres plü daimpró. I orun renforzé chësc raport tres la mobilité transfrontaliera“, chësc á sotligné i dui assessurs Florian Mussner y Ingrid Felipe. N percurs che á bele porté sü früc, ince deache cun la fin dl 2014 él gnü amplié i coliamënc direc danter le Tirol y le Südtirol sön la linia dles ferates dl Prener, sciöche ince sön la linia dla Val de Puster. Sön chëstes trates él implü poscibl da s’anuzé dles tarifes a miú prisc dl Südtirol Pass y dl Verkehrsverbund Tirol. La Provinzia de Balsan investësc por chësc proiet cina le 2019 indöt 4,3 miliuns de euro, le Land Tirol 3,7 miliuns.
Na seria de mioramënc él ince gnü registré sön la trassa sura le Ju de Resia, cun n aumënt di iadi dles corieres che coliëia la Val Venosta nia ma cun l’Austria, mo ince cun la Svizra. L’obietif detlaré di dui assessurs Florian Mussner y Ingrid Felipe é chël da jí inant sön le percurs scomencé, ince sce al é gnü a se le dé de plü dificoltés por gaujia de n aumënt poscibl di controi söl Prener. Tratan l’incuntada de incö ai 25 de forá a Desporch él ince gnü rajoné di coliamënc cina Trënt y de ci mosöres atué por motivé les imprejes da passé dal trasport sön strada a chël sön les scines.
„I messun se fá sintí ince a Viena, Roma y Bruxelles – á sotligné l'assessuria Ingrid Felipe – por che ai capësces che nosta area alpina é dër sensibla y che al é nezesciar da smendrí tres deplü le trasport sura le Prener y da mioré inscö la cualité dl’aria.“ Ince por l’assessur Florian Mussner „él nezesciar da svilupé alternatives series, conretes y sostenibles por le trasport dles marcianzies y ince por le trasport privat. Nosta priorité é insciö da mët le focus sön la ferata che é n meso de trasport ecosostenibl.“
rc
