Atualità
Referendum söl aeroport, apel da jí a lité
Le presidënt Arno Kompatscher inviëia i südtirolej da jí a lité en domënia ai 12/06 y da tó pert al referendum söl finanziamënt publich dl aeroport da Balsan.
En domënia, ai 12 de jügn dl 2016, á i südtirolej la poscibilité da dí la süa, tres n referendum consultif, sön le dessëgn de lege presenté dala Junta provinziala y che porta le titul „normes söl aeroport da Balsan“. Al pó jí a lité indöt 379.104 zitadins residënc te Südtirol scric ite tles listes eletorales, y indöt 31.044 residënc foradecá che pó eserzité so dërt de lita tres corespondënza. Les seziuns eletorales sará indöt 487, a chëres che al röia lapró 7 seziuns preodüdes por les usc tres corespondënza
Apel da jí a lité
„Da jí a lité ne é nia ma n dërt mo al rapresentëia ince na poscibilité concreta da se tó sö sües responsabilités. Le referendum consultif söl aeroport ti pita ince a düc i zitadins l’oportunité da ti dé gran pëis a süa usc: na partezipaziun alta foss ince n segnal sterch por la politica y por chësta gaujia é mi apel chël da jí a lité y dé jö süa usc“, dij le presidënt dla Provinzia Arno Kompatscher. Le presidënt dla Provinzia sotlignëia inant che „ince sce le cuorum por la validité dl referendum é dl 40 porcënt, respetará la Junta provinziala te vigni caje l’orenté di zitadins, mo al é tler che na partezipaziun alta foss ince na garanzia plü sigüda por n’azetanza plü alta dles mosöres tl dagní. Dai 13 de jügn inant nen jarara spo dla metüda en pratica dl resultat dla consultaziun.“
Modalités dla lita
Les litadësses y i litadus messará se presenté tla seziun dada dant sön le zertificat lital, ares y ai mëss avëi para le zertificat lital y n documënt de reconoscimënt (ti caji de pordüda o arobada contaté i ofizi litai comunai). Les sëntes litales é davertes da zirca les 07.30 cina ales 22.00 en domënia ai 12 de jügn dl 2016. Les operaziuns de cumpëda dles usc metará man dales 07.00 de en lönesc ai 13 de jügn y sará da odëi sön la plata internet lites.provinzia.bz.it y sön la plata facebook dla Zentrala litala Südtirol.
Sön ci vëgn pa lité?
Le dessëgn de lege „Normes sön l’aeroport de Balsan“, che le Consëi provinzial á fat fora da fá lité tres n referendum consultif, definësc i obietifs de svilup dl aeroport por ci che reverda le interes publich y stabilësc n tët mascimal dl finanziamënt publich por la gestiun dla plaza di fligri.
Por ci che reverda i obietifs de svilup, che l’aeroport messará arjunje dal 1 de jená dl 2022 inant él n numer minim de 170.000 passajiers al ann y al ne podará nia superé la categoria 2C. L’ativité de jore tratan döt le de é preodüda dales 06.00 ales 23.00 por jori de linia y indere dales 07.00 ales 22.00 por i jori charter. Por ci che reverda le finanziamënt publich podará la Provinzia sostigní dal 2017 inant la gestiun dl aeroport cun finanziamënc de 2,5 miliuns de euro al ann y dal 2022 inant cun 1,5 miliuns de euro, en acordanza cun la normativa dl’UE. Sce al ne gnará indere nia arjunt i obietifs de svilup cina le 2022 gnará le finanziamënt da pert dla Provinzia sospenü.
Sce o No
„Orëise che al vëgnes aprové le dessëgn de lege n. 60/2015, che reverda les „Normes sön l’aeroport de Balsan“, por chël che le Consëi dla Provinzia autonoma de Balsan á deliberé ai 4 de dezëmber dl 2015 l’indiziun de n referendum consultif?“: Chësta é la domanda che dötes les zitadines y düc i zitadins che á le dërt de lita tl Südtirol ciafará sön la cherta dl referendum en domënia, ai 12 de jügn dl 2016.
Che pó pa lité?
Al pó lité dötes les zitadines y düc i zitadins che á complí 18 agn cina ai 12 de jügn dl 2016, che é scric ite tles listes litales y á la residënza tla Regiun Trentin-Südtirol da cater agn zënza interuziuns y che á madorí ti cater agn n tëmp de residënza plü lunch tla Provinzia de Balsan.
Por plü informaziuns: http://lites.provinzia.bz.it/rm/index.html
rc
