Atualità
Da indoman sará la comunicaziun danter impreses y AP ma plü digitala
Da indoman sará la comunicaziun danter les impreses y les aministraziuns publiches ma plü digitala. I zitadins podará adoré inant la documentaziun sön papier.
Aladô dles diretives statales mëss les impreses comuniché cun l’Aministraziun publica (AP) te forma digitala y mëss avëi de conseguënza na misciun de posta eletronica zertificada (PEC). Da indoman (ai 11 de agost) sará ince dötes les aministraziuns publiches obliades da avëi düc i documënc originai te forma digitala: chësta data é insciö le scomenciamënt de na comunicaziun ma plü informatica danter les impreses y l’aministraziun publica. Da indoman sará varëntes trëi formes de comunicaziun che regolamentëia le raport danter impreses y aministraziun publica: tres le PEC, i sorvisc eGov azessibli tres la Cherta di zitadins y le cunt digital, o ince tres le barat de dac danter aplicaziuns, sciöche por ejëmpl la fatura eletronica. „L’aministraziun provinziala é arjignada ca ales formes de comunicaziun digitales“, sotlignëia l’assessuria Waltraud Deeg y ajuntëia che „la digitalisaziun é na gran sfidada, mo ara deura ince percursc nüs por na comunicaziun plü asvelta, saurida y efiziënta.“
Co avëi na misciun PEC
Nia dötes les impreses á na misciun PEC y nia dötes adora chësta misciun. „Chësta é na problematica nia ma por les impreses agricoles, mo plüssigü ince por les piceres aziëndes d’artejans, profescionisć lëdi y d’atri“, spliga Deeg. Le passaje ala comunicaziun digitala ne pón nia evité: a livel statal él bele tröc sorvisc publics che vëgn manajá tres chësc sistems, por ejëmpl l’INPS. Por chësta gaujia él l’assessuria Deeg che damana la colaboraziun de dötes les assoziaziuns economiches che ares dëides le plü che ara vá i iscric tla fasa de converjiun al digital. „Tl dagní sará insciö la comunicaziun plü asvelta y efiziënta“, dij Deeg.
Degöna oblianza por zitadins y assoziaziuns
Le comunicaziun digitala é por le momënt ma d’oblianza por les impreses, i privac y les assoziaziuns podará s’anuzé de so dërt da presenté domandes y detlaraziuns (y ince ciafé documentaziuns) sön papier. Le decret statal prevëiga ince che dai 11 de agost mëss les aministraziuns publiches registré i documënc originai ma plü te forma digitala: chësc ó dí che i documënc sön papier messará gní digitalisá dal’AP. „Vigni ofize cherié i originai te na manira digitala, che sará spo firmá digitalmënter dai suranstanc, protocolá y mená inant ai destinatars te formes desvalies“, spliga le diretur dla Repartiziun provinziala informatica Kurt Pöhl. Les formes é la spediziun via PEC, de na copia sön papier dl documënt digital original cun la Posta, sce le destinatar en á degöna PEC o degöna misciun email. Te caji de prozedöres particolares ametüdes dala lege é la spediziun garantida tres le cunt digital sön la Rëi zivica. I privac pó ince tl dagní mené les domandes tres i sorvisc eGov (sce a desposiziun), sön papier, tres le PEC y tres email cun na copia dl documënt d’identité. Ma les impreses, sciöche dit, é obliades da comuniché estlusivamënter te forma digitala.
I sorvisc eGov é gnüs ampliá
La Repartiziun informatica á bele scomencé cun le proiet por pité ti proscims trëi agn indöt 200 formes de sorvisc eGov. De plü vari por alisiré chësc prozes de digitalisaziun é bele gnüs fac da n grup de laur aposta al intern dl’AP: por ejëmpl i vademecum por la gestiun de formulars, l’adatamënt ales aplicaziuns web y dl portal eGov, socmenciadies por l’ajornamënt dles conescënzes dl personal. „I orun acompagné i zitadins te chësta perioda de digitalisaziun cun sorvisc tres plü azessibli ince por s’anuzé dles gran oportunités che nes vëgn pitades dai prozesc de digitalisaziun“, dij Waltraud Deeg.
rc
