Atualità
-
Sëurandà lëures per slargë la streda de Gherdëina
Tl Assessorat provinziel ai lëures publics iel (NCUEI) ai 27 de setëmber unì sëurandat i lëures per slargë l stradon de Gherdëina da Pruca ite, tl raion “Villnad”. La ncëria ti ie jita ala firma Oberosler SF de Bulsan.
-
Lites provinzieles cun 14 listes, orden sun la zedules da lité
Danter 14 listes puderan ai 27 de utober crì ora pra la veles provinzieles. Chësc à (NSNUET) ai 26 de setëmber fat al savëi l’autorità zentrela dla lites do che l à messù unì stlut ora doi listes (Di Pietro Italia dei Valori y Fratelli d’Italia). Nce l orden di sënies de lista sun la zedules da lité ie unì trat ora a sort.
-
Giaurì la segonda edizion dl Innovation Festival
Cun l moto „Weitblick/Ampie vedute“ vëniel a Bulsan pità la segonda edizion dl fetival dl inuvazion dedicà ala mont, la cumenanza y la tecnologia. Te 34 ëura de program per la scoles, 35 ëura de workshops y cunvënies, te 70 manifestazions cun 140 reladëures da diesc nazions, vëniel pità na vijion ampla. L festival ie unì giaurì (NCUEI) ai 26 de setëmber.
-
Referat sön i neologisms, ai 10 d’otober tla Teßmann
Ala creaziun de parores nöies él dediché le referat dal titul “Von Wutbürger bis Fiskalpakt“, ai 10 d’otober tla Biblioteca Provinziala Friedrich Teßmann. La sëra vëgn metüda a jì adöm cun la “Gesellschaft für deutsche Sprache”/Seziun de Balsan.
-
Mostra “uncutted” a Urtijëi: mo n’ena leprò
La mostra de pitures de Barbara Tavella che stluj ju la lingia de mostres da instà dl Istitut Culturel Ladin y che ie da udëi tla sala dla Lia Mostra d’Ert a Urtijëi, resta davierta n’ena plu giut, nchin ai 5 de utober.
-
Referat tla Teßmann sön la poscibilité y i risć di e-books
“Gutenberg goes electronic“ é le titul dl referat che la Biblioteca provinziala Teßmann a Balsan mët a jì ai 3 d’otober. Tl cheder dla linia de referać „Texturen“ baia Stephan Füssel dl’Université Johannes Gutenberg de Mainz dla poscibilité y di risć di e-books por la letöra y la leteratöra.
-
40 stieres per nsenië talian
Tla scoles elementeres de rujeneda tudëscia vëniel cris 40 nsenianc de talian sciche segonda rujeneda. L cuncors aldò ie (NCUEI) ai 23 de setëmber unì publicà tla Gazëta ufiziela. Nteressei possa se nunzië nchin ai 23 de utober.
-
Fundazion Dolomites-Unesco partner dl’Expo-Dolomiti: prejentazion ai 25 de setëmber
L svilup tl raion dla Dolomites sciche arpejon mundiela, ciunes che sarà la sfides y la pusciblteies che pieta l recunescimënt da pert dl’Unesco sarà argumënt de descuscion pra la “Expo delle Dolomiti” a Longarone tl Belun. Partner de chësta fiera ie la Fundazion Dolomites-Unesco che prejënterà la fiera n mierculdi, 25 de setëmber a Bulsan.
-
Dala senteda dla Jonta provinziela dl 23 de setëmber
La pusciblteies per i chemuns de cumpré prudoc da tlo, l program naziunel per to su muciadives y la cunsciderazion de me na pert di paiamënc per la cura de mëndri ie states la dezijions dla Jonta provinziela de majer nteres che l Presidënt dla Provinzia à cunedì (NCUEI) ai 23 de setëmber tla cunferënza stampa do la senteda.
-
Jonta provinziela: program per muciadives y cura de mëndri
Tla Provinzia de Bulsan uniral da cajo a cajo tëut la dezijion sun la cumpëida de muciadives da tò su. Chësta posizion ie unida cunedida (NCUEI) ai 23 de setëmber do avëi refudà l program naziunel SPRAR. Tla medema senteda à i assessëures provinziei fat ora che i paiamënc provinziei per la cura de mëndri vën me n pert calculei sciche davani.