Atualità

USP – i argumënc tratei dala Jonta provinziela te si senteda da (NCUEI) ai 8 de agost fova plu che auter de carater aministratif. La senteda ie unida meneda dal vizepresidënt Hans Berger y à durà manco giut permez a zënza. I argumënc de majer nteres reverda la uneranzes dl Südtirol, i mplanc fotovoltaics, i ejams da maestri de schi, l giavé archeologich pra cantieres y l smendrì de burocrazia.

USP – N lunesc ai 5 de setëmber uniral sëurandat la uneranzes provinzieles per l 2011. L uneranza de merit unirà data a 9 persunaliteies che ne vif nia tl raion provinziel ma che à data n sustëni sterch al svilup dla provinzia. La Jonta provinziela à (NCUEI) ai 8 de agost delibrà la sëurandata dla uneranzes che unirà danterauter dates al prufessëur Richard Argreiter che vën da na familia badiota, l cumisser dl guviern da dant Carla Scoz, l segreter generel dl Quirinale Gaetano Gifuni y l’ex parlamenter trentin Renato Ballardini.

USP – Cun la ntroduzion dla detlarazion unificheda de davani y avëi, puderà la families dal prim de setëmber fé na sëula detlarazion. La Jonta provinziela de Bulsan à (NCUEI) ai 08 de agost dat pro i criteries y la modaliteies per l cuntribut a families y l paië ora la contes per via telematica sparanian a chësta maniera na bela pert de burocrazia.

USP – Sun 12 cëses provinzieles dëssel unì fat mplanc fotovoltaics per trasfurmé energia dl surëdl te strom eletrich. Chësc à fat ora i assessëures provinziei te si senteda dl 08 de agost (NCUEI). I mplanc nueves fej sparanië n’emiscion de 303 tones de CO2.

USP – Canche l vën abinà reperc archeologics a giavé grunt, suzedel for inò che i tëmps dl frabiché se tira n lonch. La Jonta provinziela à (NCUEI) ai 08 de agost fat ora de ti unì ancontra ai patrons de cantieres, dajan sëura criteries nueves per paië ora privac che lascia giavé da archeologhes.

USP – La Jonta provinziela se pera contra n ejam da maester de schi fat tl Montenegro y che ie unì recunesciù dal minister talian per l sport.

USP - En mertesc, ai 16 d’agost dl 2011, ti vëgnel dè ia i posc’ por l’ann de scolina 2011/12 al personal pedagogich dles scolines ladines. La lîta di posc’ scomencia dales 9 da doman tla sënta dla Direziun dles scolines a Picolin.

USP – N gran mostra coletiva dl’ert nueva tl Südtirol sarà n auter ann, tl 2012, l resultat de na culaburazion danter la repartizions provinzieles dla cultura y l Museion. Artisc’ jëuni possa mo se nunzië nchin ala fin de utober per fé pea la mostra “Panorama 4”. Nce urganisazions artistiches possa se nunzië artisc’ al Ufize provinziel per la cultura per chësta mostra che tol ite duta trëi grupes de rujeneda.

USP - 34 nsenianc ladins à (NCUEI) ai 05 de agost pudù pië do na stiera sciche suplënza anuela tla scoles ladines. Tla Ntendënza ladina a Bulsan iel unì sëurandat la stieres per i nsenianc dla scoles elementeres, mesanes y autes che à fat l’abilitazion y che fova tla graduatories aldò. 59 stieres per suplënzes unirà i proscimi dis sëurandates diretamënter dala direzions de scola aldò dla graduatories de istitut per i nsenianc zënza abilitazion.

USP – N vënderdi ai 12 de agost uniral tl Tublà da Nives te Sëlva giaurì la mostra tal titul „Oswald von Wolkenstein in Art 1961-2011“. L unirà mustrà retrac dl ciantautor, poet, cumponist y politich che ie unic fai ntan i ultimi 50 ani da 14 artisc tudësc, svizeri y dl Sudtirol. La giaurida sarà dala sies da sëira.