Atualità
Veles provinzieles: 53 mile vijitadëures di resultac
USP – Dassënn grant ie inier stat l nteres peri resultac dla veles provinzieles 2008 publichei sun la plates internet dla Provinzia. Aldò dla nfurmazions dla Sozietà nfurmatica Südtirol, ie stat 53.681 vijitadëures sun feter 4 milions de plates ududes.
Tres la plates provinzieles internet www.provincia.bz.it/elezioni ti ie inier, 27 de utober states do 53.681 persones ai resultac dla veles. Chësc ie feter 20.000 de plu che dan cin ani. De ndut iel unì cialà 3.968.511 plates, tl 2003 nen fovel stat 1,4 milion. La majera cumpëida de vijitadëures fej marueia sce n tën cont che dala 14.30 oven bele finà de cumpedé la stimes de lista y chëles de preferënza. Chësc, de gra ala bona urganisazion y l bon lëur che i presidënc dla sezions de vela à fat, dajan tres i resultac drët aslune cun l BlackBerry.
L majer ntres ala plates internet ie stat ntëur la 14.00 canche n ie ruvei daujin al resultat finel. L plu suvënz iel unì cialà la preferënzes dla SVP, la plata cun i resultac de duta la provinzia y l paredlé cun i resultac dl 2003.
La plates cun i resultac de vela ie nce states da arjonjer tres n link dla plates dal zaites Corriere della Sera, Der Standard, l’Adige y la zaita online www.affaritaliani.it. Truep nteres ie nce stat da oradecà, nsci iel stat vijitadëures dal’Austria, Germania, Svizra y mplu nchinamei dala Gran Bretagna, Francia, Australia, Spagna, Svezia, Canada, Brasil, Nueva Zelanda.
L di dl cumpedé ora la stimes y co che l ie unì laurà tl zënter stampa tla cësa provinziela Widmann a Bulsan, ie nce unì documentà tres n video dl Ufize stampa provinziel, che ie online sota www.provinzia.bz.it/usp tl internet, tl capitul “Video online”.
as
