Atualità
Materies de matura tla scoles ladines
USP – La materies che unirà damandedes tla segonda prova scrita dl’ejam de stat tla scoles autes ladines ie unides crisses ora. La Ntendënza ladina à una cun l Ministèr dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.
L diretëur de repartizion Alexander Prinoth spiega che la materies per la segonda prova scrita da chëst ann tla scoles de Gherdëina y Badia ie seguredes.
Ti Istituc per l cumerz a Urtijëi y La Ila uniral tl sezion per l cumerz IGEA damandà la materia de economia aziendela tla prova scrita. Cumëmbri dla cumiscion da oradecà puderà damandé i sculeies do economia aziendela, geografia economica y dërt. Tla sezion turistica y de rujeneda dla scola auta Raetia a Urtijëi messerà i candidac ënghe dé ju na prova scrita de economia aziendela y leprò nce scienzes dl turism. Nsenianc da d’autra scoles puderà damandé ora la materies talian, dërt, economia soziela, geografia economica y turistica.
Tl Lizeo linguistich a La Ila uniral tla segonda prova scrita damandà la prima rujeneda fulestiera. Talian, filosofia y scienzes natureles unirà damandedes dai nsenianc da demez.
Tla Scola d’ert a Urtijëi vel l dësseni per la segonda prova scrita. La materies talian, elemënc economics y soziei, conc y fisica unirà damandedes da cumiscioneres da d’autra scoles.
USP
