Atualità
Dal 1999 iel unì finanzià 1,8 miliardes per l frabiché alesirà
USP – La Provinzia de Bulsan à ti ani passei spendù ite 1,8 miliardes de Euro per l frabiché alesirà. Chësc ie unì prejentà n ucajion di diesc ani dla lege per sustenì l frabiché de cuatieres.
“Passa 25.000 dumandes per frabiché n cuatier ie ti diesc ani passei unides dates pro tres l dipartimënt provinziel per frabiché cuatieres. Leprò an nce pudù sëurandé feter 5.000 cuatieres” nsci à l assessëur Christian Tommasini prejentà l bilanz dl prim dejené. Cun la nuvità dl sustëni per la categuria de davani mesan y la normes nueves per copies jëunes, ti uniral tl daunì pità a de plu persones l’ucajion de giapé n sustëni per l cuatier da viver. Mpede spënder truep scioldi per cuntribuc, dëssel ti proscimi trëi ani unì frabicà feter 1000 cuatieres da afité: chësc se mbincia l assessëur cumpetënt nuef.
Te chisc diesc ani da canche fova jit n drova la lege per sustenì l frabiché cuatieres ie unì fat truep per ti ruvé do ai bujëns dla populazion. La lege ie nchin a ncuei unida adateda y miureda nuef iedesc. Te chësc tëmp iel unì dat ora cuntribuc per judé te 22.102 caji a avëi nstës n cuatier. La Provinzia à tlo dat ora 643,4 milion de Euro. Cun n sustëni de ndut 49,7 milion de Euro iel unì judà a fé ora y adaté 2839 de vedli cuatieres.
Tres l Istitut per l’edilizia soziela (IPES) à ti diesc ani passei 2.227 families giapà la tleves de cuatieres nueves. Leprò iel mo unì sëurandà 2.750 cuatieres soziei fai ora da nuef. N media à l istitut pudù sëurandé a families feter 500 cuatieres al ann. Al mumënt vëniel frabicà 535 cuatieres soziei y per 316 iesen tl lëur de fé la proietazion. “Te truep caji mancel l grunt da frabiché, perchël ie debujën de pruzedures che va inant plu debota y la culaburazion di Chemuns” spiega l diretëur de repartizion Adolf Spitaler.
N cont de cuntribuc per paië l fit dl cuatier iel l ann passà unì dat ora 31,8 milion de Euro a feter 10.000 families.
Per pudëi realisé i programs de frabiché cuatieres iel dantaprima debujën dl grunt. La Provinzia de Bulsan à ti diesc ani passei finanzià 1.476.442 metri cuadrac de grunt per l frabiché alesirà. Mplu ie nce unì finanzià 269.511 metri cuadrac de grunt che i chemuns ova cumprà, dan che l unissa detlarà da frabiché. Per grunc dl frabiché alesirà y la nfrastrutures primeres à la Provinzia mprestà 158 milion de Euro ala families y dat 209,3 milion de Euro de cuntribuc.
as
